Տեսանյութեր
Լուսանկարներ
Հակակոռուպցիոն կոմիտեն ձևավորում է օպերատիվ շտաբ՝ ընտրական գործընթացների վերահսկման համար
2026 թվականի հունիսի 7-ին կայանալիք Ազգային ժողովի ընտրություններին ընդառաջ՝ Հակակոռուպցիոն կոմիտեում քննարկվել են ընտրական հանցագործությունների կանխարգելման և հիբրիդային սպառնալիքներին դիմակայելու մեխանիզմները։ Կոմիտեի նախագահի գլխավորությամբ կայացած նիստում որոշում է կայացվել ձևավորել մշտադիտարկման օպերատիվ շտաբ՝ ապահովելու քվեարկության գործընթացի թափանցիկությունն ու օրինականությունը։
Հակակոռուպցիոն կոմիտեի տարածած հաղորդագրությունում նշված է.
«Օրակարգում ընդգրկված առանցքային հարցերը ներառել են՝
- Ընտրական գործընթացների մշտադիտարկման օպերատիվ շտաբի ձևավորումը,
- Հիբրիդային սպառնալիքներին դիմակայելու կոմիտեի գործառույթների սահմանումը,
- Նախաքննական և օպերատիվ ստորաբաժանումների փոխլրացնող գործունեության համակարգումը և առաջիկա անելիքների պլանավորումը,
- Ընտրական հանցագործությունների հայտնաբերման, բացահայտման և քննության ոլորտում ծառայողների մասնագիտական պատրաստվածության բարձրացումը։
Կոմիտեի նախագահին ներկայացվել է աշխատանքների ընթացիկ վիճակը, գույքագրվել են առկա խնդիրներն ու առաջիկա անելիքները։ Քննարկումների արդյունքում նախագահի կողմից տրվել են հստակ հանձնարարականներ՝ ընտրական գործընթացների մշտադիտարկման օպերատիվ շտաբի ձևավորման ժամկետների, կազմի և աշխատակարգի սահմանման, ինչպես նաև հիբրիդային սպառնալիքներին դիմակայելու գործիքակազմի և ներգրավվելիք միջոցների հստակեցման վերաբերյալ։ Միաժամանակ հանձնարարականներ են տրվել նախաքննական և օպերատիվ ստորաբաժանումների աշխատանքի համակարգված պլանավորման ուղղությամբ։
Կոլեգիայի նիստի ընթացքում կարևորվել է կոմիտեի գործուն դերը ընտրական գործընթացների թափանցիկությունն ու օրինականությունն ապահովելու գործում, ինչպես նաև գործողությունների արդյունավետ համակարգումը՝ առկա ռիսկերին արագ և հետևողական արձագանք ապահովելու նպատակով:
Մեկնաբանել