Առողջապահական և աշխատանքի տեսչական մարմնի որոշմամբ Հայաստանում դադարեցվել է «Ֆերետաբ քոմպ» դեղի 7 սերիաների վաճառքը՝ որակի անհամապատասխանության պատճառով։ Տեսչական մարմինը հրահանգել է «Տոնուս-Լես», «Ալֆա-Ֆարմ Իմպորտ», «Նատալի Ֆարմ», «Էսկուլապ-Իմպորտ» և «Թեոֆարմա Իմպորտ» ընկերություններին հետ կանչել նշված սերիաների խմբաքանակները․ 

1. F02490 (պիտանի է մինչև 31.05.2026)
2. G08684 (պիտանի է մինչև 30.06.2026)
3. G08683 (պիտանի է մինչև 31.07.2026)
4. G08033 (պիտանի է մինչև 31.07.2027)
5. H10279 (պիտանի է մինչև 30.09.2027)
6. H01931 (պիտանի է մինչև 30.09.2027)
7. F02491 (պիտանի է մինչև 31.07.2027)

«Ֆերետաբ քոմպ» դեղամիջոցը նախատեսված է օրգանիզմում երկաթի պակասը լրացնելու համար։ Դեղամիջոցը սովորաբար նշանակվում է անեմիայի (սակավարյունության) դեպքում, ինչպես նաև հղիության, կրծքով կերակրելու, կամ այնպիսի այլ դեպքերում, երբ օրգանիզմում առկա է երկաթի պակաս։ 

Ըստ արտադրող շվեյցարական «Ացինո Ֆարմա ԱԳ» ընկերության տվյալների՝ լաբորատոր հետազոտությունները ցույց են տվել, որ այս սերիաներում երկաթի քանակը չի համապատասխանում սահմանված չափանիշներին։

Տեսչական մարմինը հորդորում է լինել ուշադիր և խուսափել նշված սերիաներով դեղերի օգտագործումից։

Լուսանկարը՝ irecommend.ru / © Կարինա Իվանովնա