Գորիս համայնքի ղեկավար Առուշ Առուշանյանի ազգականին պատկանող «Բեսթ ռոուդ» ՍՊԸ-ն այս տարվա մարտի 19-ին 312 մլն դրամի պայմանագիր է կնքել Գորիս համայնքի հետ՝ մասնակցելով համայնքի հայտարարած բաց մրցույթին, որին այլ մասնակից չի եղել։ Ըստ կնքված պայմանագրի մասին հայտարարության՝ ընկերությունը պետք է հիմնանորոգի Գորիս քաղաքի մի քանի փողոցներ։ Ընկերությունը 2019 թվականի հունիսի 13-ին հիմնադրել է Հայկ Բաղդասարյանը և մինչ օրս 100% սեփականատերն է։

2021 թվականի հունիսին Սյունիքի մարզի քրեական դատարանում սկսվել էր Առուշ Առուշանյանին վերաբերող քրեական վարույթի քննությունը, որում նշվում էր՝ «Բեսթ Ռոուդ» ընկերության սեփականատեր Հայկ Բաղդասարյանը Առուշանյանի հորեղբոր թոռն է, բայց ընկերության փաստացի սեփականատերն Առուշանյանն է։ Այս գործով Առուշանյանին քրեական օրենսգրքի մի քանի հոդվածներով մեղադրանք էր առաջադրվել, այդ թվում՝ այն, որ «Բեսթ Ռոուդ» ՍՊԸ-ի միջոցով զբաղվել է ապօրինի ձեռնարկատիրությամբ և առանց պայմանագրի՝ ընդերքի օգտագործմամբ։ Այս մեղադրանքի վերաբերյալ դատարանը նշել է, որ ընկերության՝ փաստացի Առուշանյանին պատկանելու հանգամանքը չի հիմնավորվել։

Առուշ Առուշանյանը մեզ հետ զրույցում ասաց, որ մրցույթին մասնակցում են տարբեր ընկերություններ, և «Բեսթ Ռոուդ» ընկերությունն արտոնյալ կարգավիճակ չունի։ Իսկ Հայկ Բաղդասարյանն իր հեռավոր ազգականն է, որին վաղուց չի հանդիպել։ Ըստ նրա՝ շահերի բախում այս գործարքում չկա։

Առուշ Առուշանյանը 2017 թվականից զբաղեցնում է Գորիս համայնքի ղեկավարի պաշտոնը։ Նա 2021 թվականի խորհրդարանական ընտրություններին մասնակցում էր «Հայաստան» դաշինքի ընտրացուցակով։ Վերջին շրջանում Առուշանյանը դադարեցրել է քննադատությունները Նիկոլ Փաշինյանի և նրա կառավարության վերաբերյալ։ Այս տարվա մարտի 15-ին Գորիս այցի ժամանակ Փաշինյանին ուղեկցում էր նաև Առուշանյանը։