«Ժամանակակից ակադեմիական երաժշտություն լսել և հասկանալը շատերի համար բարդ է, բայց երբ դա հաղթահարվում է, բացվում են երաժշտության ընկալման նոր հորիզոններ, որոնք փոխում են և մոտեցումները և նույնիսկ ապրելակերպը»,- այսպիսի խորհուրդ է տալիս կոմպոզիտոր Սերգեյ Ումրոյանը ոչ երաժիշտ ունկնդիրներին իր՝ «Ինչպե՞ս լսել ու հասկանալ ժամանակակից ակադեմիական երաժշտությունը» հոդվածում։ 

«Խաչմերուկներ. ժամանակակից երաժշտության օրեր Հայաստանում» փառատոնը նպատակ ունի զարգացնել, խթանել ժամանակակից ակադեմիական երաժշտությունը Հայաստանում։ Ամենամյա փառատոնը այս տարի սկսվեց Դիլիջանում` երիտասարդ կոմպոզիտորների ակադեմիայից։ Էդվարդ Միրզոյանի անվան կոմպոզիտորների միության ստեղծագործական տանը մասնակիցները հնարավորություն ունեցան  կատարելագործել արագ ստեղծագործելու իրենց հմտությունները և վարպետության դասեր անցնել  կոմպոզիտորներ Արամ Հովհաննիսյանի, Ռուբեն Անտոնյանի և Սերգեյ Ումրոյանի մոտ։ Իննամյա փառատոնը վերջին 2 տարիներին անցկացվում է  «Ernst von Siemens» երաժշտական հիմնադրամի ֆինանսավորմամբ: Փառատոնը Հայաստանում առաջին ծրագիրն է, որին աջակցում է  նորարարությունն ու ապագայի երաժշտությունը խթանող հեղինակավոր հիմնադրամը։

Մայիսի 24-ին` ժամը 19։30-ին, «Առնո Բաբաջանյան» համերգասրահում տեղի ունեցավ «Խաչմերուկներ. ժամանակակից երաժշտության օրեր Հայաստանում» փառատոնի բացման համերգը, որին ելույթ ունեցավ փառատոնի ռեզիդենտ «Ասոնանս» անսամբլը՝ Հայաստանում ժամանակակից ակադեմիական երաժշտության միակ անսամբլը (երաժիշտներ՝ Նարեկ Ավագյան (ֆլեյտա), Արսեն Գրիգորյան (կլառնետ), Իվետա Կորկինա (ջութակ), Թերեզա Նաչարյան (ջութակ), Միքայել Նավասարդյան (թավջութակ), Անահիտ Դիլբարյան (դաշնամուր), Գայանե Ասլանյան (դաշնամուր))։

Համերգային ծրագրում ընդգրկված էին 6 երկրներից (Հայաստան, Վրաստան, Ուկրաինա, Լիտվա, Լատվիա, Էստոնիա) ընտրված երիտասարդ կոմպոզիտորների նոր գործեր: