«Ուժեղ Հայաստան» դաշինքի 200 թեկնածուներն ընդհանուր 5 մլրդ 797 մլն դրամին համարժեք գումար են հայտարարագրել, որից ավելի քան 1,5 մլրդ դրամը ցուցակի առաջին համար Նարեկ Կարապետյանինն է։ Թեկնածուները միասին 3 մլրդ 190 մլն դրամ եկամուտ են հայտարարագրել, սակայն նրանց 24%-ը գործազուրկ է։

Գործարարներ, փաստաբաններ և գործազուրկներ. ովքե՞ր են դաշինքի միլիոնատերերը, ովքե՞ր են ամենաբարձր եկամուտ ստացողները և ամենաշատ գույք ունեցող թեկնածուները։

«Հետք»-ն ուսումնասիրել է դաշինքի 200 թեկնածուների հայտարարագրերը։

«Ուժեղ Հայաստան» դաշինքը ձևավորվել է «Ուժեղ Հայաստան», «Նոր դարաշրջան» և «Միավորված հայեր» կուսակցություններից։

Դաշինքի 1-ին համարը գործարար Սամվել Կարապետյանի եղբորորդին է՝ Նարեկ Կարապետյանը։ Նա «Տաշիր կապիտալ» ՓԲԸ-ի գլխավոր տնօրենն է։

Նարեկ Կարապետյանն անցումային համակարգողի կարգավիճակ է ունենալու, քանի որ դաշինքի վարչապետի թեկնածուն Սամվել Կարապետյանն է։ Թեև սահմանադրական խոչընդոտին՝ «Ուժեղ Հայաստան»-ը որոշել է, որ խորհրդարանում մեծամասնություն ձևավորելով՝ կփոխի Սահմանադրության 148-րդ հոդվածը: Ըստ այդ հոդվածի՝ Կառավարության անդամը պետք է բավարարի պատգամավորին ներկայացվող պահանջները, այսինքն՝ վերջին 4 տարում Հայաստանում մշտապես բնակվող, միայն Հայաստանի քաղաքացի լինի։

Հայտարարագրերում արտացոլված են ներկայացման օրվան նախորդող 12 ամիսների գույքի, եկամուտների ու դրամական միջոցների վերաբերյալ տվյալները։

Ի՞նչ են հայտարարագրել առաջին 5 համարները 

Ցուցակի առաջին համար Նարեկ Կարապետյանը հայտարարագրել է Տաշիր համայնքի Լեռնահովիտ գյուղում 0.188 հա մակերեսով մեկ բնակելի տուն և 12 հողամաս՝ ընդհանուր 3.44 հա մակերեսով։ 0.4 հա մակերեսով մեկ հողամաս էլ Կարապետյանն ունի Վահագնի թաղամասում։

128.4 քմ մակերեսով 1 բնակարան էլ Կարապետյանը ունի Մոսկվայում։ 

Նա հայտարարագրել է 2 ավտոմեքենա՝ 2025թ. արտադրության Toyota Camry և 2021թ. արտադրության Mercedes Benz։

Հաշվետու ժամանակահատվածում Կարապետյանը 675.000 դրամ աշխատավարձ է ստացել «Տաշիր կապիտալ» ՓԲԸ-ից և 56.2 մլն դրամ նվիրատվություն՝ Արթուր Հովագիմյանից։

Նարեկ Կարապետյանի դրամական միջոցները կազմել են 16.5 մլն դրամ, 1.8 մլն դոլար և 2.1 մլն եվրո։

«Տաշիր ագրո» ՓԲԸ-ի 100%-ը, «Սյունէներգաշին» ՓԲԸ-ի 98.8%-ը և «Թի թաուեր» ՓԲԸ-ի 50%-ը պատկանում են Նարեկ Կարապետյանին։

Ցուցակի երկրորդ համարը փաստաբան Արամ Վարդևանյանն է, ով 2021թ.-ին պատգամավոր էր ընտրվել Ռոբերտ Քոչարյանի գլխավորած «Հայաստան» դաշինքի ցուցակով։ Նա 3 բնակարան է հայտարարագրել Երևանում (49.9 քմ, 62.1քմ, 76.56 քմ), 2 ավտոմեքենա՝ 2024թ. արտադրության BYD yuan plus և 2022թ. Lexus RX 350։

Ընդհանուր 164 մլն 47 621 դրամի եկամուտ և 175 մլն դրամի, 29 000 դոլարի դրամական միջոց է հայտարարագրել։

Նա «Ջեյ-Փի փաստաբանական գրասենյակ»-ի հիմնադիր-փաստաբան է, 67% բաժնեմաս ունի։

Ցուցակի 3-րդ համար «Ուժեղ Հայաստան» կուսակցության նախագծերի ղեկավար Գոհար Մելոյանը հայտարարագրել է 1 բնակարան Երևանում՝ 102.6 քմ, 1 բնակելի տուն Առինջ գյուղում՝ 276.9 քմ և 1 ոչ բնակելի տարածք Երևանի կենտրոնում՝ 135.45 քմ մակերեսներով։

Հայտարարագրել է 7,9 մլն դրամ և 4700 դոլար։ «ՋԻ ԷՄ ԼԵԳԱԼ» ՍՊԸ-ում 25% բաժնեմաս ունի, ընկերության համահիմնադիրն է։ Հաշվետու ժամանակահատվածում 17 մլն 580 հազ. 040 դրամ եկամուտ է ստացել։

Դավիթ Ղազինյանը «Հրազդանի էներգետիկ կազմակերպություն» ԲԲԸ տնօրենների խորհրդի նախագահն է, ցուցակի 4-րդ համարը։

Հայտարարագրել է 3 հողամաս, որոնցից երկուսը (5,9 հա, 1,1 հա) Դիլիջանում են, մեկը՝ Հրազդանում (5 հա)։ 

3 բնակելի տուն ունի Երևանում (536 քմ), Արագածոտնում (454 քմ) և Կոտայքում (187 քմ), 4 ավտոմեքենա։

Որպես 8 մլն դրամը գերազանցող գույք Ղազինյանը հայտարարագրել է 10 մլն դրամ արժողությամբ ժամացույց։

Նա 19,6 մլն դրամի եկամուտ է ստացել «Հրազդանի էներգետիկ կազմակերպություն»-ից, 643 413 դրամի և 870 դոլարի վարկ է վերցրել։

100 մլն դրամ, 200 հազար դոլար և 50 000 եվրո. այսքան դրամական միջոց է հայտարարագրել Ղազինյանը։

«Ռոադիքս» ՍՊԸ-ի 100% բաժնեմասերը պատկանում են նրան, «Կարիգագ» ՍՊԸ-ի՝ 70%-ը, «Տաճատ-62» և «Տիդա 2023» ՍՊԸ-ների 50%-ը։

Ցուցակի հնգյակը ավարտվում է կուսակցության նախագծերի ղեկավար Ռուբեն Մխիթարյանով։

Նա հայտարարագրել է 2 բնակարան՝ Երևանում (91,7քմ) և Աբովյան (95,01քմ) քաղաքում, 1 ավտոմեքենա՝ 2018թ. արտադրության Mercedes-Benz GLS։

Մխիթարյանն ունի18 մլն 489 հազ. ընդհանուր եկամուտ, 1870 ֆրանկ էլ նվիրատվություն է ստացել։

Նրա դրամական միջոցները կազմել են 73 մլն դրամ, 10 հազ. դոլար, 15 հազ. Ֆրանկ։

Ամենաշատ եկամուտ ունեցողները 

200 թեկնածուներից ամենաշատ եկամուտն ունի ցուցակի 50-րդ համար Հայկ Վարդանյանը։ Հայտարարագիրը ներկայացնելու պահին նա գործազուրկ է եղել։ Հայկ Վարդանյանը հայտարարագրել է ընդհանուր 184 մլն 422 050 դրամի եկամուտ։ Ըստ հայտարարագրի՝ նա այս եկամուտները փոխառություն է ստացել տարբեր անհատներից և «Մոնոլիտ ԷՅԷՄ» ՍՊ ընկերությունից։ Միևնույն ժամանակ, Վարդանյանը հայտարարագրել է 60 մլն դրամ և 59 հազ. դոլար գումար։

Ունի 1 բնակելի տուն, 8 հողամաս (համատեղ և ընդհանուր բաժնային սեփականություն) Աշտարակ քաղաքում, և 4 ավտոմեքենա՝ համատեղ սեփականությամբ։

Երկրորդ ամենաշատ եկամուտն ունեցել է ցուցակի 70-րդ համար Էդգար Ասատրյանը, ով հայտարարագրել է 175 մլն 844 628 դրամ, որը գոյացել է նրա աշխատավարձից, ավանդի տոկոսադրույքից, փոխառությունից և վարկից։

Նա «Պրոմ սինթեզ գրուպ» ՍՊԸ-ի տնօրենն է, հայտարարագրել է նաև 1 բնակարան Երևանում (111քմ) և 1 բեռնատար։ 50 մլն 200 հազ. դրամ դրամական միջոց է հայտարարագրել։

Ցուցակի 2-րդ համար Արամ Վարդևանյանը ամենաշատ եկամուտ ունեցող 3-րդ թեկնածուն է։ Փաստաբան Արամ Վարդևանյանի ընդհանուր եկամուտները կազմել են 164 մլն 047 621 դրամ։ Նա «Ջեյ-Փի փաստաբանական գրասենյակ»-ի հիմնադիր-փաստաբան է, 67% բաժնեմաս ունի, հաշվետու ժամանակահատվածում ամենախոշոր եկամուտը՝ 67 մլն դրամը, Վարդևանյանը ստացել է այս ընկերության շահաբաժնից, մյուս խոշորը՝ 40,5 մլն դրամը, «Տաշիր կապիտալ» ՓԲԸ-ից աշխատավարձ է ստացել։

Թեկնածուներից 14-ն, ըստ հայտարարագրի, որևէ եկամուտ չի ունեցել։

Ամենաշատ դրամական միջոցներ ունեցող թեկնածուները

Դրամական միջոցներով առաջատար է ցուցակի առաջին համար Նարեկ Կարապետյանը, որը հայտարարագրել է ավելի քան 1,5 մլրդ դրամ։

Երկրորդ ամենաշատ դրամական միջոցներն է հայտարարագրել ցուցակի 123-րդ համար Մարիամ Կարապետյանը, որի դրամական միջոցները կազմել են 203 մլն 972 հազ. 655 դրամ։

Մարիամ Կարապետյանն աշխատում է «Գազպրոմ Արմենիա» ՓԲԸ-ում՝ որպես իրավաբանական բաժնի գլխավոր մասնագետ։ Նա հայտարարագրել է 1 ավտոմեքենա՝ 2024թ. արտադրության Lixiang L9: 

Կարապետյանը հաշվետու ժամանակահատվածում 5 մլն 860 հազ. 570 դրամ աշխատավարձ է ստացել, ևս 4000 դոլար՝ նվիրատվություն։

Ցուցակի 4-րդ համար Դավիթ Ղազինյանը դրամական միջոցներով երրորդն է։ Նա հայտարարագրել է 194 մլն 700 հազ. դրամ։ Ինչպես նշել էինք, նա «Հրազդանի էներգետիկ կազմակերպություն» ԲԲԸ տնօրենների խորհրդի նախագահն է։

Ամենաշատ անշարժ և շարժական գույք ունեցողները

Ցուցակի 26-րդ համար Վրույր Այվազյանը և 82-րդ համար Մհեր Տոնոյանը ամենաշատ անշարժ և շարժական գույքն են հայտարարագրել՝ ընդհանուր 21 միավոր։ 

Վրույր Այվազյանը «Հատիկ» գյուղատնտեսական կոոպերատիվի նախագահն է։ Հայտարարագրել է 1 բնակելի տուն Գյուլագարակում, 18 հողամաս և 2 մեքենա։ Հաշվետու ժամանակահատվածում 37 մլն 979 հազ. 474 դրամի եկամուտ է ունեցել և ընդհանուր 10 մլն 426 հազ. 640 մլն դրամ գումար։

Մհեր Տոնոյանը «Գազպրոմ Արմենիա» ՓԲԸ-ում իրացման գծով տնօրենի տեղակալ է։ Հայտարարագրել է 1 բնակարան Երևանում, 15 հողամաս, 3 ոչ բնակելի տարածք և 2 ավտոմեքենա։ Տոնոյանը հայտարարագրել է 31 մլն 733 հազ. 276 դրամի եկամուտ և 59 մլն 175 հազ. դրամ դրամական միջոցներ։

3-րդ ամենաշատ գույք ունեցող թեկնածուն ցուցակի 31-րդ համար Անուշավան Մանուչարյանն է։ Նա «ՀԱՐԻ ԳՐՈՒՊ» ՍՊԸ-ի փոխտնօրենն է։ Հայտարարագրել է 2 բնակարան, 1 բնակելի տուն, 12 հողամաս, 1 ավտոկայանատեղի, 2 ոչ բնակելի տարածք և 2 ավտոմեքենա։

Հայտարարագրել է ընդհանուր 11 մլն 541 հազ. 056 դրամ եկամուտ և 32 մլն դրամ գումար։

200 թեկնածուներից 48-ը չի աշխատում։ 4-ը դրամական միջոց չի ունեցել հայտարարագիր ներկայացնելու պահին։

Թեև թեկնածուների 24%-ը գործազուրկ է, սակայն նրանց մի մասը պասիվ եկամուտ ունի։ Օրինակ, թեկնածուներից մեկը՝ Ալեքսանդր Սարգսյանը, չի աշխատում, սակայն ունի հյուրանոցի սենյակ Դուբայում, որը տարեկան 45 183 դոլար եկամուտ է բերում։ Բացի այդ, հայտարարագրել է նաև բնակարաններ Աթենքում և Երևանում։ Որպես վարձակալության վճար էլ, հավանաբար, Աթենքում գտնվող բնակարանից, ստացել է 10 հազ. 933 եվրո։

«Ուժեղ Հայաստան» դաշինքի 200 թեկնածուներից 133-ը համանուն կուսակցությունից են, 27-ը՝ «Միավորված հայեր», 20-ը՝ «Նոր դարաշրջան», 2-ը՝ «Ապրելու երկիր», իսկ 18-ն ակուսակցական են։

Թեկնածուների միջին տարիքը 43-ն է։ Դաշինքի ցուցակում կանայք 35%-ն են կազմում։ 

Ինֆոգրաֆիկաները՝ Նարե Պետրոսյանի