ՀԱԿ խմբակցության պատգամավոր Նիկոլ Փաշինյանը խորհրդարանում վերահսկիչ պալատի նախագահ Իշխան Զաքարյանից հետաքրքրվեց, թե հաշվետու ժամանակաշրջանում ինչպես է ընթանում նրա տան շինարարական աշխատանքները, որը կառուցվում է Նոր Նորքում:

Իշխան Զաքարյանը խուսափողական պատասխան տվեց: Ասաց, թե հարցը քննարկվող թեմայի հետ կապ չունի, սակայն կպատասխանի: Ըստ նրա` իր տունը կառուցվում է արդեն 7 տարի, մինչդեռ վերահսկիչ պալատի նախագահ է 5 տարի: Վերահսկիչ պալատի նախագահը նշեց, որ իր տան հետ կապված պարզաբանումներ տվել է եւ չի ցանկանում նորից անդրադառնալ:

Հիշեցնենք, որ այսօր վերահսկիչ պալատի նախագահը Ազգային ժողովում ներկայացնում է 2011թ-ի հաշվետվությունը:

Նիկոլ Փաշինյանը նշեց, թե ներկայացված հաշվետվությունը հանրության համար նորություն չէ եւ դեկլարատիվ բնորոշեց ներկայացվածը, քանի որ հաշվետվությունը զերծ է կոնկրետ փաստերից: Չկան կոնկրետ դեպքեր, թե ովքեր են հակամրցակցային հարաբերությունների մեջ մտել կամ հավելագրումներ արել եւ այլն:

Պատգամավորը նկատեց, որ հաշվետվության մեջ թեեւ ընդհանուր առմամբ բացակայում են կոնկրետ անուններ, սակայն տեղ են գտել կադաստրի Ամասիայի եւ Ճամբարակի ստորաբաժանումների անունները: «Տպավորությունն այնպիսին է, որ խեղճերի անուններն է գրվել, որպեսզի մյուսներն ավելի շահեկան վիճակում լինեն»,-ավելացրեց Ն. Փաշինյանը:

Պատգամավոր Կորյուն Նահապետյանն էլ հետաքրքրվեց, թե վերահսկիչ պալատը ինչու է 3 հաղորդում ներկայացրել դատախազություն, երբ բազմաթիվ չարաշահումներ են հայտնաբերել:

Իշխան Զաքարյանը հավելեց, թե բոլոր հաշվետվությունները տեղադրվում են վերահսկիչ պալատի կայքում եւ դատախազությունն էլ կարող է ուսումնասիրել եւ քրեական գործեր հարուցել: «Հասկանում եմ, որ իմ պատասխանները ձեզ չի գոհացնում, բայց ասացի այն, ինչ ասացի»,-հավելեց վերահսկիչ պալատի նախագահը: