Այս կիրակի՝ հոկտեմբերի 25-ին, Ստեփանավանում ՏԻՄ ընտրություններ կանցկացվեն։ 19,278 ընտրող ունեցող այս համայնքը ղեկավարելու համար պայքարում է չորս քաղաքական ուժ՝ «Քաղաքացիական պայմանագիր», «Ուժեղ Հայաստան», «Գործարար» և «Հանրապետություն» կուսակցությունները։ Ստեփանավանի ՏԻՄ ընտրություններին մասնակցելու հայտ էր ներկայացրել նաև «Հայրենիք» կուսակցությունը, սակայն օրեր առաջ կուսակցությունը ինքնաբացարկ հայտնեց։

Ազգային ժողովը հունիսի 17-ին երկրորդ ընթերցմամբ և ամբողջությամբ ընդունեց ««Վարչատարածքային բաժանման մասին» օրենքում փոփոխություններ կատարելու մասին» և «Տեղական ինքնակառավարման մասին» օրենքում լրացումներ կատարելու մասին» օրենքների նախագծերի փաթեթը։ Այս նախագծով ձևավորվեց Ստեփանավան նոր խոշորացված համայնքը՝ միավորելով գործող Ստեփանավան, Գյուլագարակ և Լոռի Բերդ համայնքները՝ ընդհանուր 20 բնակավայրերով:

«Հետքն» ուսումնասիրել է Ստեփանավանի ՏԻՄ ընտրություններին մասնակցող ավագանու անդամի բոլոր թեկնածուների՝ Կենտրոնական ընտրական հանձնաժողով ներկայացված հայտարարագրերը։

«Քաղաքացիական պայմանագիր» կուսակցություն

«Քաղաքացիական պայմանագիր» կուսակցության ցուցակը Ստեփանավանի ընտրություններում գլխավորում է Լոռի Բերդ համայնքի ղեկավար Արայիկ Ներսիսյանը։ Նա 1991-2017 թվականներին ղեկավարել է Կողես բնակավայրը։ 2017-ին՝ համայնքի խոշորացումից հետո ընտրվել է խոշորացված Լոռի Բերդ համայնքի ղեկավար։

Արայիկ Ներսիսյանը հաշվետու ժամանակահատվածում ստացել է 4.7 մլն դրամ աշխատավարձ Լոռի Բերդի համայնքապետարանից։ 1.2 մլն դրամ էլ ստացել է վարձակալության վճար «Հունայկա» ՍՊԸ-ից։ Ներսիսյանը հայտարարագրել է 35 մլն դրամ և 60 հազար դոլար։

Արայիկ Ներսիսյանը 37 անշարժ գույք ունի։ Նա հայտարարագրել է 5 բնակարան, որոնցից 1-ը՝ Երևանում, 4-ը՝ Ստեփանավանում, 3 առանձնատուն Ստեփանավանում, հասարակական նշանակության 2 շինություն Լոռի Բերդում, արտադրական նշանակության շինություն Կողեսում, 3 ավտոտնակ Ստեփանավանում և 23 հողամաս, որոնցից 4-ը՝ Յաղդանում, 19-ը՝ Կողեսում։

Արայիկ Ներսիսյանն ունի 6 տրակտոր, 3 «Mercedes Benz»՝ 2000, 2004 և 2008 թվականների արտադրության, 2010 թվականի արտադրության «Ford», 2004 թվականի արտադրության «Ford Transit 2.4D» և 1996-ի «Ford Transit 2.4»։

Ցուցակի երկրորդ համարը Նարեկ Նալբանդյանն է։ Նա ՀԷՑ-ի Դեբեդ մասնաճյուղի Ստեփանավան էլեկտրացանցի պետն է։ Նրա աշխատավարձը հաշվետու ժամանակահատվածում կազմել է 3.7 մլն դրամ։ 2.4 մլն դրամ աշխատավարձ էլ ստացել է «ԲԷՑ» ՓԲԸ-ից։

Նարեկ Նալբանդյանի խնայողությունները կազմել են 3 մլն դրամ և 5000 դոլար։ Նա հայտարարագրել է նաև 2016 թվականի արտադրության Lada Granta մակնիշի մեքենա։

Ստեփանավանի թիվ 3 հիմնական դպրոցի վարչատնտեսական մասի համակարգող Հերմինե Ջանջուղազյանը ՔՊ-ի ցուցակի երրորդ համարն է։ Նա հաշվետու ժամանակահատվածում ստացել է 2.8 մլն դրամ աշխատավարձ։ 

Ջանջուղազյանը Ստեփանավան քաղաքում գտնվող 288 քմ մակերեսով առանձնատան սեփականատեր է։

«Ուժեղ Հայաստան» կուսակցություն 

Ընդդիմադիր «Ուժեղ Հայաստան» կուսակցության ցուցակի առաջին համարը Արսեն Գևորգյանն է։ Նա զբաղվում է ձեռնարկատիրական գործունեությամբ, որից հաշվետու ժամանակահատվածում ստացել է մոտ 37 մլն դրամի եկամուտ։ Գևորգյանի խնայողությունները կազմել են 2.2 մլն դրամ։ Անշարժ կամ շարժական գույք «Ուժեղ Հայաստան»-ի առաջին համարը չի հայտարարագրել։

Դավիթ Մաթևոսյանը ցուցակի երկրորդ համարն է։ Նա չի աշխատում։ Գյուղատնտեսական գործունեությունից Մաթևոսյանը ստացել է 1 մլն դրամ եկամուտ, 12.000 եվրո էլ ֆինանսական օգնություն է ստացել երկու անձից։ Մաթևոսյանը հայտարարագրել է 3 մլն դրամ, 400 դոլար, 20.000 եվրո և 110.000 ռուբլի։

Մաթևոսյանը 1.4 հա ընդհանուր մակերեսով 4 հողամաս ունի Գարգառ գյուղում։ Նույն գյուղում Դավիթ Մաթևոսյանն ունի 3 բնակելի տուն և անասնաշենք։ Նա հայտարարագրել է նաև 2 մեքենա՝ Range Rover և Ford Transit։

«Աստղիկ» ԲԿ-ի Տաշիրի մասնաճյուղի ֆինանսական և կազմակերպչական հարցերով ղեկավար Մարինե Վահրամյանը «Ուժեղ Հայաստանի» երրորդ համարն է։ Նա «Աստղիկ» ԲԿ-ից ստացել է 2.7 մլն դրամ աշխատավարձ։

Վահրամյանը Ստեփանավանում գտնվող 2 անհատական բնակելի տան սեփականատեր է։ Նա հայտարարագրել է նաև 2013 թվականի արտադրության Mercedes Benz C250 մակնիշի ավտոմեքենա։

«Գործարար» կուսակցություն

«Գործարար» կուսակցության ցուցակը Ստեփանավանի ՏԻՄ ընտրություններում գլխավորում է գործող համայնքապետ Արմեն Գրիգորյանը։ Նա վերջին մեկ տարում Ստեփանավանի համայնքապետարանից ստացել է 6.7 մլն դրամ աշխատավարձ։ Հայտարարագիրը ներկայացնելու օրվա դրությամբ ունեցել է 19.4 մլն դրամ։

Արմեն Գրիգորյանը Ստեփանավան քաղաքում 791 և 445.5 քմ մակերեսներով երկու բնակելի տուն ունի։ Նա նաև 107.7 քմ մակերեսով բնակարան ունի Երևանի Քանաքեռ-Զեյթուն վարչական շրջանում, 412 քմ մակերեսով հողամաս և 5599 քմ մակերեսով արտադրական նշանակության շինություն Ստեփանավանում։ Գրիգորյանը հայտարարագրել է նաև 1996 թվականի արտադրության Lexus LX450 մակնիշի ավտոմեքենա։

Հմայակ Մարտիրոսյանը, ով «Ստեփանավանի Վ. Թեքեյանի անվան թիվ 6 միջնակարգ դպրոց» ՊՈԱԿ-ի վարչատնտեսական գծով համակարգողն է, «Գործարար» կուսակցության երկրորդ համարն է։

Մարտիրոսյանը հաշվետու ժամանակահատվածում ստացել է 3.6 մլն դրամ աշխատավարձ։ Հայտարարագիրը ներկայացնելու օրվա դրությամբ ունեցել է 200 հազար դրամ։ Անշարժ կամ շարժական գույք չի հայտարարագրել։

«Վիվա Արմենիա» ՓԲԸ-ի Ստեփանավանի սպասարկման գրասենյակի ավագ մասնագետ Կարինե Նազարյանը «Գործարար» կուսակցության ցուցակի երրորդ համարն է։ «Վիվա Արմենիա» ՓԲԸ-ից վերջին մեկ տարում ստացել է 3.6 մլն դրամ աշխատավարձ։ Հայտարարագիրը ներկայացնելու օրվա դրությամբ ունեցել է 9000 դրամ և 200 եվրո։

Կարինե Նազարյանն ունի 54 քմ մակերեսով բնակարան Երևանում, 0.1 հա մակերեսով հողամաս Ստեփանավանում և 2016 թվականի արտադրության Toyota Camry մակնիշի մեքենա։

«Հանրապետություն» կուսակցություն

«Հանրապետություն» կուսակցության ցուցակը Ստեփանավանի ՏԻՄ ընտրություններում գլխավորում է Արտակ Ալեքսանյանը։ Նա չի աշխատում, ԿԸՀ ներկայացրած հայտարարագրում էլ հաշվետու ժամանակահատվածի համար եկամտի որևէ աղբյուր չի նշել։

Հայտարարագիրը ներկայացնելու օրվա դրությամբ Ալեքսանյանն ունեցել է 12 մլն դրամ և 20.000 դոլար։ Նա 70% բաժնեմաս ունի «Արթուր» Ա/Կ-ում։

Ցուցակի երկրորդ համարը Արմեն Ալեքսանյանն է։ Նա Արտակ Ալեքսանյանի երկվորյակ եղբայրն է։ Արմեն Ալեքսանյանը զբաղվում է ձեռնարկատիրական գործունեությամբ։

Հայտարարագիրը ներկայացնելու օրվա դրությամբ ունեցել է 30 մլն դրամ և 30 հազար դոլար։ Ալեքսանյանը 1200 քմ մակերեսով հողամաս ունի Ստեփանավանում և 300 քմ մակերեսով անասնագոմ։ Արմեն Ալեքսանյանը հայտարարագրել է նաև 2020 թվականի արտադրության Jeep մակնիշի մեքենա։

«Հանրապետություն» կուսակցության ցուցակում Ալեքսանյան եղբայրներին հաջորդում է Մարիաննա Մարտիրոսյանը։ Նա չի աշխատում, իսկ հայտարարագիրն ամբողջությամբ դատարկ է։

Ովքե՞ր են ամենահարուստ թեկնածուները

Վերջին մեկ տարում Ստեփանավանի ավագանու անդամի թեկնածուներից ամենաշատ եկամուտը ստացել է «Քաղաքացիական պայմանագրի» ցուցակի 34-րդ համար Հայրապետ Ջուլհակյանը։ Նա գյուղատնտեսական գործունեությունից ստացել է 40 մլն դրամ եկամուտ։

Երկրորդ ամենաշատ եկամուտ ստացած թեկնածուն «Ուժեղ Հայաստանի» ցուցակը գլխավորող Արսեն Գևորգյանն է։ Նա ձեռնարկատիրական գործունեությունից ստացել է 37 մլն դրամ եկամուտ։

Ամենաշատ եկամուտ ունեցողների եռյակը եզրափակում է «Գործարար» կուսակցության նախընտրական ցուցակի 4-րդ համար Արմեն Գրիգորյանը։ Նա «Դավք-Գրիգ» ՍՊԸ-ի տնօրենն է։ Այս ընկերությունից հաշվետու ժամանակահատվածում ստացել է 1.6 մլն դրամ աշխատավարձ։ 25 մլն դրամ էլ Գրիգորյանը վարձավճար է ստացել «ՆՆ հոլդինգ» ՍՊԸ-ից։

Արմեն Գրիգորյանը նաև ամենաշատ դրամական միջոցներ հայտարարագրած թեկնածուների եռյակում է։ Հայտարարագիրը ներկայացնելու օրվա դրությամբ նա ունեցել է 46.8 մլն դրամ, 12.400 դոլար, 2.200 եվրո և 80.000 ռուբլի։

Ստեփանավանի ավագանու անդամի 156 թեկնածուներից 45-ը, ըստ հայտարարագրի, առհասարակ եկամուտ չի ունեցել։ Եվ նրանցից միայն 6-ն է ունեցել 10 մլն դրամը գերազանցող եկամուտ։

Ամենաշատ դրամական միջոցներ էլ հայտարարագրել է ՔՊ ցուցակի առաջին համար Արայիկ Ներսիսյանը։ Նրա դրամական միջոցները կազմել են 35 մլն դրամ և 60.000 դոլար։

Այս ցուցանիշով երկրորդը «Քաղաքացիական պայմանագրի» 16-րդ համար Արթուր Հարությունյանն է։ Նա հայտարարագիրը ներկայացնելու օրվա դրությամբ ունեցել է 28.8 մլն դրամ, 37.800 դոլար և 28.600 եվրո։

Ավագանու անդամի 156 թեկնածուներից 62-ն առհասարակ խնայողություններ չունեն։ Թեկնածուներից 55-ն էլ մինչև 1 մլն դրամ է հայտարարագրել։ Իսկ 10 մլն դրամից ավելի գումար հայտարարագրել են ավագանու անդամի թեկնածուներից 14-ը։

Ստեփանավան համայնքի ավագանու ընտրություններին թեկնածուների թվով առաջատարը «Ուժեղ Հայաստան» կուսակցությունն է՝ 51 թեկնածու, «Քաղաքացիական պայմանագիրը»՝ 50, «Գործարար» կուսակցությունը՝ 35, նրանցից հինգը ՔՊ կուսակցության անդամներ են։ Թեկնածուների թվով վերջին տեղում է «Հանրապետություն» կուսակցությունը. առաջադրվել է 20 հոգի։

Ընդհանուր 156 ավագանու թեկնածու է ներառված չորս կուսակցությունների ցուցակներում, որոնց 38%-ը չի աշխատում։

Այս ցուցանիշն ամենաբարձրն է «Ուժեղ Հայաստան» կուսակցության դեպքում՝ 69%։ Երկրորդ տեղում «Հանրապետություն» կուսակցությունն է՝ 60%, հաջորդում է «Գործարար»-ը՝ 29%, իսկ «Քաղաքացիական պայմանագիրը»՝ 6%։

Կանանց ամենամեծ ներգրավվածությունը «Քաղաքացիական պայմանագիր» կուսակցությունն է ապահովել՝ 36%, որը օրենքով սահմանված նվազագույն չափից շատ բարձր չէ, ինչը կարելի է ասել նաև մյուս կուսակցությունների դեպքում։ Երկրորդ տեղում «Գործարար» կուսակցությունն է՝ 34%, «Ուժեղ Հայաստան»՝ 31%, «Հանրապետություն»՝ 30%: