Երևանի քաղաքապետարանը, ի պատասխան «Հետքի» հարցման,  հայտնում է, որ Հրազդանի կիրճի «Մերիդիան» էքսպոկենտրոնին հարող հատվածում առաջիկայում նախատեսվում են մաքրման աշխատանքներ։ 

Քաղաքապետարանը միաժամանակ տեղեկացնում է, որ «Մերիդիան Հոլդինգ» ՓԲԸ-ի նկատմամբ 2025 թվականի նոյեմբերի 18-ին արձանագրություն է կազմվել՝ Ոսկերիչների փողոցի 1 հասցեի հարակից տարածքում առանց քաղաքաշինական համապատասխան փաստաթղթերի ճանապարհի վերակառուցման աշխատանքներ իրականացնելու համար։ 

«Հետքը» գրել էր COP17-ի անցկացման համար նախատեսված «Մերիդիան» էքսպոկենտրոնի հարակից շինարարության ընթացքում հողային ու քարային զանգվածները Հրազդանի կիրճ լցնելու մասին։ 

Քաղաքապետարանի փոխանցմամբ՝ Ոսկերիչների փողոց 1 հասցեում կիսակառույց շինության վերակառուցման, ավարտման և կցակառույցի իրականացման շինարարության թույլտվությունը տրվել է 2026 թվականի հուլիսի 31-ին։ Նույն օրը տրվել է նաև Ոսկերիչների փողոցի հիմնանորոգման թույլտվությունը։

Պատասխանում նշվում է, որ շինարարը նախազգուշացվել է աշխատանքների ընթացքում բնապահպանական օրենսդրության պահանջները պահպանելու մասին։ 

Սակայն քաղաքապետարանը չի պարզաբանում՝ եթե դեռևս 2025 թվականի նոյեմբերին արձանագրվել էին առանց համապատասխան փաստաթղթերի ճանապարհի վերակառուցման աշխատանքներ, ինչպե՞ս է վերահսկվել աշխատանքների հետագա ընթացքը, այդ թվում՝ 2026 թվականի հուլիսին շինթույլտվությունները տրամադրելուց հետո։ 

Պատասխանից պարզ չէ նաև՝ շինարարին նախազգուշացնելուց բացի ի՞նչ միջոցներ են ձեռնարկվել կիրճում հողային ու քարային զանգվածներ լցնելը կանխելու և հետևանքները վերացնելու համար։