Այսօր Կառվարության շենքի մոտ կրկին հավաքվել էին մի խումբ մարդիկ` պահանջելով իրենց ոտնահարված իրավունքների պաշտպանություն: Կառավարության շենքից դուրս եկեղ պաշտոնյաներին իրենց պահանջներն էին ներկայացնում Կենտրոնի իրենց տներից վտարված բնակիչները, զոհված զինծառայողների ծնողները և այլք:

«Ավազակապետություն: Ինչ ժողովրդավարության մասին եք խոսում, երբ սպանում, թալանում եք սեփական ժողովրդին: Իրավունքներից եք խոսում, բայց մեզ էս օրն եք հասցրել»,- գոռում էին հավաքվածները:

«Դուք ներում եք, ես չեմ ներում»,- բղավում էր բողոքի ակցիայի մասնակիցներից Սվետլանա Աթոյանը: Նա պահանջում է դատապարտել այն բժիշկներին, ում ներարկած սխալ դեղերի հետևանքով մահացել է իր հղի դուստրը` 25-ամյա Կարինեն:

Յոթ մեղադրյալից դատապարտվել է միայն 2 բժիշկ` 5.5 տարվա ազատազրկման: Սակայն 2 տարի անց` այս տարվա հունիսին, նրանք համաներմամբ ազատ են արձակել: Սվետլանա Աթոյանը պահանջում էր ազատազրկել այդ բժիշկներին և որակազրկել նրանց: «Մինչև կյանքիս վերջ պայքարելու եմ»,- ասում էր նա:

«Ես իմ օրինական իրավունքններն եմ պահանջում», - ասում էր Նինել Իվանյանը:

«Արմենիա» հանրապետական հիվանդանոցի նախկին բուժաշխատողը պահանջում է, որ իրեն վերադարձնեն նախկին աշխատանքին, քանի որ իրեն աշխատանքից հեռացնելու` հիվանդանոցի տնօրեն Գրիգոր Գրիգորյանի որոշումը համարում է սխալ և անօրինական:

Նյութական վնասներից բացի` Իվանյանը պահանջում է իրեն հասցված բարոյական վնասների փոխհատուցում` բազմաթիվ  վիրավորանքների և իրեն «հոգեկան հիվանդ» անվանելու համար: «Թող ապացուցեն, որ հոգեկան եմ, իրենց արածն է հոգեկան»,- ասում էր նա:

«Ոստիկանները սուտասան են»,- հայտարարում էր Վարդգես Գասպարին: Վերջինս 2008 թ. ապրիլին դատապարտվել էր ազատազրկման մարտի 1-ի գործով, այնուհետև ազատ էր արձակվել: Այժմ Վարդգես Գասպարին ոստիկաններին մեղադրում է իրեն ճնշելու, իր նկատմամբ անօրինական գործողություններ կատարելու մեջ: Գասպարին ոստիկանների դեմ ներկայացրել է մի քանի հայց, որոնք գտնվում են տարբեր փուլերում: