Գերմանիայի Դաշնային Հանրապետության Բունդեսթագի նախագահ, պրոֆեսոր Նորբերտ Լամմերթը կարծում է, որ գոնե մոտ ապագայում նպատակահարմար չէ ընդլայնել Եվրոպական Միության կազմը, ինչն ունի գործնական պատճառներ:  Նրա խոսքերով` այսօր ԵՄ-ն ունի ակնհայտ խնդիրներ և կանգնած է բազում մարտահրավերների առջև: Նոր անդամների ավելանալու դեպքում այդ բարդ գործընթացը ավելի կբարդանա: Խնդիր կա ստեղծել եվրոպական այնպիսի մեթոդներ, որոնց միջոցով հնարավոր կլինի դիմակայել առկա մարտահրավերներին:

«Եվրամիությունը պատրաստ չէ ընդունել նոր անդամներ: Եվ մտադրություն չկա ԵՄ-ն փոխել Եվրոպայի միացյալ նահանգների: Վիճակագրորեն ԵՄ-ն կարող էր սկսել գործընթաց, որը կարող էր ավարտվել ինչպես 50 նահանգ ունեցող ԱՄՆ-ն: Բայց տարբերությունն այն է, որ ԱՄՆ-ն պետություն է, իսկ ԵՄ-ն` անդամ-պետությունների համակարգ, ինչը շատ տաբեր է»,- հայտարարեց Բունդեսթագի նախագահը:

Ն. Լամմերթի խոսքերով` կան մի շարք երկրներ, որոնք Եվրոպայի հետ ունեն քաղաքական, տնտեսական, մշակութային կապեր և հարաբերություններ: Նա համոզված է, որ առաջիկա տարիներին իրենց գործն է լինելու ստեղծել նոր ձևաչափ` զարգացնելու ԵՄ ինտեգրման գործընթացը: Այդ գործընթացին կարող են ներգրավվել այն երկրները, որոնք հետաքրքություն ունեն ԵՄ-ի նկատմամբ: Սակայն դա պետք է կատարվի առանց կառույցին անդամակցելու:

Ն. Լամմերթը նաև նշեց, որ կա քաղաքական գաղափար` ստեղծել նոր Եվրոպա: Գործնականում այդ գործընթացը սկսում է տնտեսական միության ստեղծմամբ: Այն ներառելու է 6 անդամ պետություններ` «իհարկե առանց Մեծ Բրիտանիայի»: Անդամ պետությունները կլինեն Գերմանիան, ֆրանսիան, Իտալիան, Նիդեռլանդները, Բելգիան և Լյուքսեմբուրգը: Ն. Լամմերթի խոսքերով` Եվրոպական տնտեսական միությունը նպատակ ունի լուծել ԵՄ խնդիրները և հաղթահարել դարի փորձությունները: