Կինոյում ավելի քան 40 դեր խաղացած ռուս դերասան Գրիգորի Անտիպենկոն հանդիսատեսին հայտնի է մասնավորապես «Մի ծնվիր գեղեցիկ» սերիալով, որտեղ նա խաղացել է գլխավոր հերոս Անդրեյ Ժդանովի դերը: Սակայն պակաս չեն նաև դերասանի թատերական դերերը:

Իսկ Հայաստանն նրան բերել էր «Երկուսը ճոճանակի վրա» ներակայացումը, որտեղ նա խաղում է գլխավոր հերոս Ջերիի դերը: Նրա խոսքերով` չնայած սա նրա առաջին այցն է Հայաստան,  բայց նա միշտ ցանկացել է գալ այստեղ` տեսնելու ինչպես են ապրել իր նախնիները: Գ. Անտիպենկոն նշեց, որ ինքն ունի հայկական արմատներ մայրական կողմից:

Անրադառանալով իր մասնագիտական գործունեությանը` Գ. Անտիպենկոն նշեց, որ ինքը սովորաբար նախապատվությունը տալիս է թատրոնին:

«Ես միշտ առաջին հերթին սպասում եմ թատերական ժամանակացույցին, ապա նոր ի հայտ եկած կինոնախագծերը հարմարեցնում եմ ներկայացումներին: Թատրոնն ամենկենդանի արվեստն է: Այստեղ չես կարող խաբել»,- ասում է դերասանը:

Նրա խոսքերով` եթե կինոյում կա սխալն ուղղելու, մոնտաժելու հնարավորություն, ապա թատրոնում յուրքանչյուր ներկայացման ժամանակ դերասանն ամեն ինչ անում է առաջին և վերջին անգամ դահլիճում նստած կոնկրետ հանդիսատեսի ներկայությամբ: Հենց այդ պահին դերասանը պետք է անի այն ամենը, ինչը կարող է, ինչին ունակ է:

Նրա կարծիքով` այսօր դերասանների մեծ մասի բախտը չի բերում, և նրանք հայտնվում են այն նախագծերում, որոնք իրենց առաջարկում են: Այդ առումով Գ. Անտիպնկոն իրեն հաջողակ է համարում, քանի որ ինքն ունի այդ ընտրության հնարավորությունը, թե որ նախագծին մասնակցի: Բացի այդ` նա շատ է սիրում իր գործը, որով զբաղվում է, ներկայացումները, գործընկերներին: Իսկ Ֆիգարոն այն դերն է, որը կցանկանար խաղալ:

Նրա կարծիքով` լավ դերասանը կարողանում է արագ կերպարանափոխվել ամենատարբեր նախագծերի դեպքում և ռեժիսորի հրահանգի միջոցով արագ փոխել իր դիրքերը: Դրա լավագույն ուսուցիչը թատրոնն է:

«Թատրոնը վայր է, որտեղ մենք հնարավորություն ունենք ձեռք բերել դերասանի մասնագիտությունը, և անել դա առավելապես արագ»,- ասում է դերասանը: