Այսօր՝ ժամը 18:30-ի սահմաններում, «Վալլեքս» խմբի ընկերությունների  մեջ մտնող  «Արմենիան Քափըր Փրոգրամ» ընկերությանը պատկանող Ալավերդու պղնձաձուլական գործարանի մետալուրգիական արտադրամասից հազիվ 100 մետր  վերև,  դեպի Կոշաբերդ բարձրացող ծխատարում վթար էր տեղի ունեցել:

 Ծխատարի որոշ հատված փլվել էր, ինչի պատճառով մետալուրգիական արտադրամասի արտանետումները ամբողջությամբ չէին հասնում Կոշաբերդի գագաթի ծխնելույզին և  ինչպես ծխատարի  քանդված հատվածից, այնպես էլ  գործարանի մետալուրգիական արտադրամասից մեծ քանակությամբ ծուխ էր ժայթքում:  Գազն արագությամբ տարածվեց Ալավերդու Մադան, Զորավար Ադրանիկի, Թումանյան փողոցի, գործարանի սանիտարական գոտում գտնվող  բնակելի շենքերի և այլ թաղամասերի վրա:  Շնչելը անհնարին էր դարձել գործարանի հարևանությամբ գտնվող ճոպանուղու`քաղաքի ներքևի հատվածի կայանում: Հիշեցնենք, որ Կոշաբերդի ծխատարի անորակ կառուցման մասին «Հետքը»  ժամանակին  անդրադարձել էր:  «Վալլեքս»  խմբի ընկերությունների նախագահ Վալերի Մեջլումյանը  2011թ.-ին հուլիսին Ալավերդիում լրագրողների հետ  հանդիպման ժամանակ հայտնել է. «Փաստորեն 2 տարի հետո  Թեղուտի  լեռնահանքային պղինձ-մոլիբդենային կոմբինատը սկսելու է աշխատել, որը տարեկան արտադրելու է  մոտ 28 000 տոննա պղինձ խտանյութի մեջ»:

Թեղուտի խտանյութը  վերամշակելու համար Վ.Մեջլումյանը նաև  ասաց, որ «Վալլեքս»-ի առաջ ծառացել է նոր պղնձաձուլական գործարան կառուցելու խնդիրը:  Օրերս Թեղուտ ՓԲԸ-ի վարչության անդամ  Ռուբեն Պապոյանը  հանքավայրի և կոմբինատի  շահագործման մասին «Հետքին» ասաց. «Հիմա հանքավայրում ընթանում են մակաբացման աշխատանքներ: Այն սկսել ենք 2012թ.-ից, մոտ 17 մլն տոննա մակաբացման աշխատանքներ ենք կատարել, շարունակական է դա, մինչև  կոմբինատ կգործարկվի, հանքային մարմինը ինքը պատրաստ  կլինի, որպեսզի մշակվի: Մեր ծրագրում լեռնահարստացման կոմբինատը կշահագործվի 2014թ.-ի կեսերին»: 

Այսուհանդերձ, եթե այս անգամ էլ հավատում ենք Թեղուտ ՓԲԸ-ի գլխավոր վարչության անդամի տեղեկատվությանը, ապա հիրավի  Թեղուտի հանքավայրի շահագործումը 7 սարի հետևում չէ, իսկ Ալավերդիում  նոր պղնձաձուլական  գործարան կառուցելու Վալերի Մեջլույանի  գաղափարը դեռևս կյանքի չի կոչվում:

Հարց է առաջանում՝ միթե «Վալլեքսի» սեփականատերը պատրաստվում  է Թեղուտի հանքավայրը շահագործելուց հետո բարոյապես և ֆիզիկապես  մաշված տեխնոլոգիաներով  հագեցած Ալավերդու պղնձաձուլական գործարանում իրականացնել  իր նախատեսած  60 000 տոնայից ավելի պղնձի արտադրությունը: