«Ցավոք սրտի հիմա դեռևս միջոցները չեն բավարարում, բայց ես հուսով եմ, նաև երազում եմ, որ ժամանակ գա, որ Հայաստանի յուրաքանչյուր մարզում այսպիսի մի միջազգային փառատոն լինի», - անրադառնալով «Վերածնունդ» փառատոնին` «Հետքի» հետ զրույցում ասաց Լևոն Սարգսյանը:

Վերջինս մրցույթ-փառոտնի կազմկոմիտեի նախագահն է, Մարդկային ռեսուրսների զարգացման «Փյունիկ» համահայկական հիմնադրամի հոգաբարձուների խորհրդի նախագահը, ինչպես նաև ՀՀ հատուկ հանձնարարություններով դեսպան:

Կարևորելով դասական երաժշտության փառատոնի անցկացումը` նա նշեց, որ ցանկալի կլիներ փառատոներ անցկացվեին արվեստի, մշակույթի տարբեր բնագավառներից:   

«Մշակութային կյանքը միայն մայրաքաղաքով չպետք է սահմանափակվի: Մարզերում էլ դա պետք է տեղի ունենա, որպեսզի մարզերի մշակութային կյանքն էլ զարթոնք ապրի, որպեսզի մարզի բնակիչներն իրենց արվեստից կտրված կամ զրկված չզգան», - ասում է Լ. Սարգսյանը:

Նրա խոսքերով` բացի այն, որ կարևոր է միջազգային փառատոների անցկացումը մասնավորապես Հայաստանում, հատկանշական է նաև այն հանգամանքը, որ այլ երկրների ներկայացուցիչներ գալիս և ծանոթանում են Հայաստանի մշակույթին, պատմությանն ու ավանդույթներին:

«Դա, փաստորեն, ինչ-որ տեղ մշակույթի արտահանում է», - ասում է նա:

Լ. Սարգսյանի խոսքերով` հարուստ մշակույթ ունենք, բայց պետք են նաև լուրջ ֆինանսական միջոցներ, որպեսզի այդ մշակույթը ներկայացվի ավելի լայն շրջանակների:  

«Ինչքան հնարավոր է, այնքան կազմակերպում ենք: Մեր հիմնադրամի հնարավորություններն այսքան են ներում», - ասում է Լ. Սարգսյանը:

«Հետքի» այն դիտարկմանը, որ Հայաստանում կան բազմաթիվ մեծահարուստներ, կա նաև սփյուռքի օժանդակությունը, և կարելի է այդ ռեսուսները կենտրոնացնել ու նպաստել մշակույթի զարգացմանը, Լ. Սարգսյանը պատասխանեց, որ կան բարերարներ, որոնք օգնում են:

«Բայց այդ նույն բարերարները տարբեր բնագավառների են օգնության հասնում: Միայն մշակույթով չէ այդ մարդկանց գործունեությունը սահմանափակվում: Ուղղակի դրա մասին մենք հաճախ մոռանում ենք: Բոլորիս թվում է, որ եթե ինչ-որ մի բնագավառով մենք զբաղվում ենք, դա ամենակարևոր բնագավառն է: Բայց բնագառավռները շատ են: Այնպես չէ, որ չեն անում», - ասում է Լ. Սարգսյանը:

Նրա խոսքերով` տարեցտարի նկատվում է առաջընթաց մշակույթի զարգացման բնագավառում, բայց տարեցտարի ավելանում են նաև ծրագրերը:  

«Իսկ բարեգործությունը բարի կամքի արտահայտում պետք է լինի: Այն մտածելակերպի, գիտակցության խնդիր է», - հավելեց նա: