Թատրոնի եւ կինոյի ռեժիսոր Աշոտ Ադամյանը «Հետքի» հետ զրույցում ասաց, որ երեկ կայացած ընտրություններով երեւանցին չի ընտրել իր ավագանուն: «Պատճառաբանության ամենազորեղ փաստը համատարած կեղծ ընտրություններն են»,- նշեց նա:

Աշոտ Ադամյանը չի ընդունում նաեւ այն փաստարկը, որ քվեարկած թերթիկների ու կազմված արձանագրությունների համաձայն՝ ընտրողներն իրենց ձայները տվել են ՀՀԿ-ին:

«Նրանք, ովքեր համարում են, որ այս ընտրություններն այլեւս կատարված փաստ են, կարող են «վայելել» դրա պտուղները: Ծեծված բաներ չեմ ուզում ասել, բայց որքան ավելի խորանա այս ստի եւ խաբեության վրա հենված համակարգը, այնքան ավելի դժվար կլինի ելքի փնտրտուքը»,- նշեց ռեժիսորը:

Ա. Ադամյանը, անդրադառնալով ընտրակաշառք վերցնող եւ հետո դժգոհող քաղաքացիներին, ասաց, որ նրանց դժգոհությունը ինքնարդարացման եղանակներից մեկն է, քանի որ այդ շարքին են պատկանում` «դե, ընտանիք ենք պահում», «եղունգ ունես, գլուխդ քորիր»,  «որտեղ հաց, այնտեղ կաց», «միեւնույն է. բան չի փոխվի» եւ այսպես շարունակ հնչող արտահայտությունները:

«Քաղաքացու համբերության բաժակը վաղուց արդեն լցվել է, հիմա արագորեն դատարկվում է, թասը սկսել է ժանգոտել»,- ավելացրեց Աշոտ Ադամյանը:

Լուսանկարը` Ա.Ադամյանի ֆեյսբուքյան էջից