Ախթալայի  քաղաքապետ Հայկազ Խաչիկյանը այս տարվա ապրիլին ահազանգել է Լոռու մարզպետին` նշելով բնապահպանական այն վտանգների մասին, որ առաջանում է քաղաքի վարչական տարածքում գտնվող  «Ախթալայի լեռնահարստացման կոմբինատ» ՓԲԸ-ի պոչամբարների ու պոչանքային թափոնակույտերից: Լոռու մարզպետ Արթուր Նալբանդյանը, ի պատասխան  ահազանգի,  իր 14.04.2013թ.-ի գրությամբ  «Ախթալա ԼՀԿ» ՓԲԸ-ի գլխավոր տնօրեն Մադլեն Թաշճյանին և քաղաքապետ Հայկազ Խաչիկյանին  հանձնարարել է Ալավերդու «Օրհուս» կենտրոնի  եւ  ՀԿ-ների  ներկայացուցիչների հետ Ախթալա համայնքում առաջացած  բնապահպանական խնդիրները կարգավորելու համար  20-օրյա ժամկետում մշակել ծրագիր և ժամանակացույց:

«Հանձնարությունը  մեր կողմից կատարվել է, դրան մասնակցել է նաև ԼՀԿ-ի գլխավոր ինժեներ Գագիկ Շահնազարյանը: Սակայն Մադլեն Թաշճյանը չի ընդունել մեր ներկայացրած ծրագիրն ու ժամանակացույցը և իր ծրագիրն է ներկայացրել մարզպետին, որը չի բխում Ախթալայի բնապահպանական իրավիճակից»,- ասում է Հայկազ Խաչիկյանը:   

Վերջինս 2013թ.-ի իր N48-53/13 գրությամբ Ախթալայի բնապահպանական վիճակի մասին տեղեկացրել է նաև բնապահպանության նախարար Արամ Հարությունյանին և խնդրել է նրա միջնորդությունը` Ախթալայի Բարիտ թաղամասի ոռոգման ջրագծի ջրահավաքի հարակից տարածքի պոչային 16 000 խ.մ.  և   «Նահատակ» ձորում  գտնվող պոչամբարի ներքին հատվածի  ճանապարհի եզրին թափված 95 400 խ.մ. թափոնները փակված պոչամբարներ տեղափոխելու և «Նահատակի» պոչամբարը ամբողջովին ռեկուլտիվացնելու համար:  

Բնապահպանության նախարարության աշխատակազմի ղեկավար Է. Փիրումյանը, նախարարին ուղղված Հայկազ Խաչիկյանի դիմումին գրավոր  պատասխանել է, թե Ախթալայի լեռնահարստացման կոմբինատը ընդգրկված է  ՀՀ  բնապահպանության նախարարության աշխատակազմի  բնապահպանական տեսչության կողմից 2013թ.-ի ստուգման ենթակա  կազմակերպությունների ցանկում: «Ստուգման արդյունքում լուծում կտրվեն վերոնշյալ (այսինքն` քաղաքապետի) գրությունում բարձրացված հարցերին»,-  հայտնել է Է.Փիրումյանը:

Այս պատասխանը Ախթալայի քաղաքապետին հույսեր չի ներշնչում: Նա նշեց, որ բնապահպանության նախարարության Բնապահպանական պետական տեսչությունը դեռ 2010թ.-ից  է տեղեկացված Ախթալայի  Բարիտ թաղամասի  ոռոգման ջրահավաքի 16 000 խմ և «Նահատակ» ձորի պոչամբարի ներքին հատվածի, Ախթալա - Մեծ Այրում միջհամայնքային ճանապարհաեզրին  կոտակված 95 400 խմ պոչային թափոնների մասին: Այս թափոնների վերաբերյալ էր 2010 թ. բնապահպանական տեսչության հայտնի ակտը: Դրան հաջորդեց բնապահպանության նախարարության մի քանի պաշտոնյաների ազատազրկումը:

«Դրանից  հետո նախարարությունը և  նախարար Արամ Հարությունյանը մոռացան  Ախթալայի վտանգավոր  պոչային թափոնների ու  պոչամբարների մասին»,- ասաց Հայկազ Խաչիկյանը: