Պաշտոնական այցով Լատվիայի մայրաքաղաքում գտվող Երևանի քաղաքապետ Տարոն Մարգարյանի գլխավորած պատվիրակությունն այցելել է Ռիգայի հայ առաքելական Սուրբ Գրիգոր Լուսավորիչ եկեղեցի:

Եկեղեցու հոգևոր հովիվ տեր Խոսրով քահանա Ստեփանյանը Տարոն Մարգարյանին ներկայացրել է 2011թ. օծված եկեղեցու պատմությունը: Հայ համայնքի գործուն աջակցության շնորհիվ հայ առաքելական եկեղեցու ճարտարապետական ոճով կառուցված եկեղեցին եկեղեցական արարողությունների և պատարագների ժամանակ մշտապես մարդաշատ է:

Քանի որ քաղաքապետի այցելության օրը համընկել էր հայ առաքելական եկեղեցու մեռելոց հիշատակի օրվան, եկեղեցու հոգևոր հովիվը երևանյան պատվիրակության և Ռիգայի հայ համայնքի ներկայությամբ մատուցել է հանգստյան կարգ:

Այնուհետև Տարոն Մարգարյանը Ռիգայի Լատգալես շրջանի ղեկավար Դմիտրի Պավլովի և հայ համայնքի ներկայացուցիչների ուղեկցությամբ այցելել է եկեղեցու հարևանությամբ գտնվող տարածք, որտեղ նախատեսվում է կառուցել Երևանի պուրակ:

Պուրակը կառուցվում է Ռիգայի քաղաքային իշխանության և հայ համայնքի ջանքերով: Տարոն Մարգարյանն ասել է, որ Երևանի քաղաքապետարանը ևս կաջակցի այգու կառուցման գործին և կանի հնարավորը, որ հանգստի գոտում լինի երևանյան շունչը: Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: