HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Օֆշորային պատմության բացահայտման բանալիները

սկիզբը

«Ամերիաբանկ» ՓԲԸ-ն օֆշորի սկանդալային պատմության մեջ առանցքային դերակատարում ունի: Հիշեցնենք, որ հենց այս բանկն է ադամանդագործ Սուքիսայանին տրամադրել 12 մլն դոլար վարկ, որի դիմաց գրավադրվել էր գործարար Փայլակ Հայրապետյանի ունեցվածքը: Վարկային փաթեթի հիմքում դրված բիզնես ծրագրի հեղինակը հենց «Ամերիաբանկ»-ն է: «Ամերիաբանկ» ՓԲԸ-ից  ստացված վարկային գումարից 9 մլն 370 հազար 450 ԱՄՆ դոլար փոխանցվել է «HELLENIC BANK PUBLIK COMPANY»` մի քանի օֆշորային ընկերությունների հաշվեհամարներին: Այդ ընկերություններն են`

  1. «A.B.S. GLOBAL LIMITED» ՍՊԸ-ին` 7 մլն 20 հազար 450 դոլար,
  2. «WLISPERA HOLDINGS LIMITED» ՍՊԸ-ին՝ 350 հազար դոլար,
  3. «STR EMERALD LIMITED» ՍՊԸ-ին՝ 2 մլն դոլար:

«Ամերիաբանկը» չի ստուգել Աշոտ Սուքիասյանի ներկայացրած բիզնես ծրագրում առկա փաստաթղթերը: Ըստ գործող կարգի՝ բանկի ներկայացուցիչը պետք է նաեւ տեղում` Սիերա Լիոնեում, ստուգեր այդ փաստաթղթերում առկա տեղեկությունները:  Վարկառու Աշոտ Սուքիասյանի հետ պայմանավորվածության համաձայն՝ բանկի իրավաբանը պետք է մեկներ Սիերա Լիոնե, սակայն ինչ-ինչ պատճառներով նա չի մեկնել: Բայց բանկը շարունակել է պարտաճանաչ փոխանցումներ կատարել Կիպրոս: «Ամերիաբանկը» ընդհանուր առմամբ 10 մլն 700 հազար դոլար է փոխանցել Աշոտ Սուքիասյանին: Վերջինիս մեղադրանք է առաջադրվել. նրա նկատմամբ  խափանման միջոց է ընտրվել կալանավորումը, հայտարարվել է հետախուզում:

Իսկ եթե բանկը ժամանակին հետևեր իր վարկային ծրագրին, վարկառուի պարտավորությունների կատարմանը, ապա կտեսներ,  որ Աշոտ Սուքիասյանը վարկային գումարներով ձեռք է բերել մեծ քանակությամբ ոսկի, «Բենթլի» մակնիշի ավտոմեքենա, տուն, ներդրում է կատարել սրճարանի շինարարության մեջ, «Մետաքս Գոլդ» ՍՊԸ –ում  և այլն:

Աշոտ Սուքիասյանին ներկայացված մեղադրանքներից մեկն էլ հանցավոր ճանապարհով ստացված առանձնապես խոշոր չափերով եկամուտներն օրինականացնելն է (ՀՀ քր. օր.-ի 190-րդ հոդ. 3-րդ մասի 1-ին կետ): Սա փողերի լվացման հայտնի հոդվածն է: Իսկ Աշոտ Սուքիասյանը փողերը լվացել է «Ամերիաբանկի» միջոցով: Արդեն հարցաքննվել են բանկի մի քանի աշխատակիցներ, բայց առաժմ չի հարցաքննվել բանկի տնօրինության նախագահ, գլխավոր տնօրեն Արտակ Հանեսյանը: Նա, իհարկե, շատ բացահայտումներ կարող է անել, որոնք կարող են դառնալ օֆշորային պատմության բանալին: Բայց այսօր կարելի է վստահաբար ասել, որ Հանեսյանը չի հարցաքննվի և ոչ մի բացահայտում էլ  չի լինի:

Ընդհանրապես գլխավոր դատախազ  Աղվան Հովսեփյանը պետք է պարզաբանի, թե ինչու է այս գործն ուղարկել ոստիկանություն` ոստիկանության քրեական գլխավոր վարչություն: Այս գործով անցնում են բազմաթիվ պաշտոնյաներ, այդ թվում` նաեւ ոստիկանապետ Վլադիմիր Գասպարյանը:  Օֆշորային սկանդալի բացահայտման բանալին գուցե հենց նրա՝ ոստիկանապետի ձեռքում է, եթե ասի, թե ում զանգով է Աշոտ Սուքիասյանին թույլատրել լքել Հայաստանի տարածքը: Հիշեցնենք, որ Փայլակ Հայրապետյանը հայտարարություն է տվել ՀՀ ոստիկանության կազմակերպված հանցավորության դեմ պայքարի գլխավոր վարչությունում, եւ նույն օրը Աշոտ Սուքիասյանը ցանկացել է լքել Հայաստանի տարածքը, սակայն նա արդեն «սեւ ցուցակում» էր, եւ նրան սահմանից բերման են ենթարկել ոստիկանություն: Նա հարցաքննվել է, ապա ազատ արձակվել: Ինչ-որ մեկի զանգով նրա անունը հանվել է «սեւ ցուցակից», ու նա կարողացել է հեռանալ Հայաստանից: Դրանից հետո Ա. Սուքիասյանն այլևս Հայաստան չի վերադարձել: 

Առայսօր չի հարցաքննվել նաև Արարատյան թեմի առաջնորդ Նավասարդ արք. Կճոյանը: Նա երկու անգամ Աշոտ Սուքիասյանի հետ եղել է Կիպրոսում: Քննիչի «մտքով չի անցնում», որ նա օֆշորային պատմության մեջ կարևոր դերակատարություն ունեցողներից մեկն է: 

«Ամերիաբանկի» ղեկավարությունը «հանգիստ» է իրեն զգում: Նրանք համոզված են, որ Հայաստանում որևէ դատարան իրենց բանկի դեմ վճիռ չի կայացնի: Բայց  Փայլակ Հայրապետյանը այս դատական գործընթացները, ինչպես արդեն հայտարարել է, տեղափոխելու է Եվրադատարան: Իսկ դա նշանակվում է, որ փողերի լվացման գործը, որում ներքաշված է «Ամերիաբանկը», հայտնվելու է միջազգային դատարանում: Այսինքն` հնարավոր է՝ բանկը հայտնվի փողերի լվացման մեջ ներքաշված բանկերի հայտնի ցուցակում: Չենք կարծում, որ այս փաստը չի անհանգստացնի բանկի սեփականատերերին:

Իսկ ովքե՞ր են բանկի սեփականատերերը: Նախ ասենք, որ «Ամերիաբանկն» էլ է գրանցված օֆշորում` Կիպրոսում:

«Ամերիաբանկ» ՓԲԸ-ի մասին

«Ամերիաբանկի» մասին մանրամասն տեղեկություններ կարելի է ստանալ բանկի կայքէջից:  Նշենք, որ «Ամերիաբանկ» ՓԲԸ-ի բաժնետոմսերի հիմնական փաթեթը` 96%-ը, 2007թ. օգոստոսին ձեռք է բերել ռուսաստանյան «Թի-Դի-Էյ Հոլդինգս Լիմիթեդը»: Վերջինս խոշոր ներդրումային ընկերություն է:  «Թի-Դի-Էյ Հոլդինգս Լիմիթեդը» 2011թ. նոյեմբերին անվանափոխվել է «ԱՄԵՐԻԱ ԳՐՈՒՊ (Սի-Ուայ) ԼԻՄԻԹԵԴ» ընկերության: 2007-2011թթ. ընթացքում աստիճանաբար ավելացնելով բանկի կանոնադրական կապիտալը` գլխավոր բաժնետեր «ԱՄԵՐԻԱ ԳՐՈՒՊ (Սի-Ուայ) ԼԻՄԻԹԵԴ» ընկերությունն իր մասնակցությունը բանկի կապիտալում ավելացրել է մինչև 99.9988997%:

Հիմա ներկայացնենք այն տեղեկությունները, որոնք բանկի կայքէջում չկան: Այսպիսով, «Ամերիաբանկ» ՓԲԸ-ի միակ բաժնետերը «ԱՄԵՐԻԱ ԳՐՈՒՊ (Սի-Ուայ) ԼԻՄԻԹԵԴ»-ն է (AMERIA GROUP (CY) LIMITED): AMERIA GROUP ( CY ) LIMITED-ը գրանցված է օֆշորում` Կիպրոսում: Ընկերությունը գրանցվել է 2007թ. հուլիսի 23-ին: Հիմնադրման օրվանից մինչեւ 15/06/2012-ը ընկերության տնօրենը եղել է Դավիթ Սարգսյանը: Դավիթ Սարգսյանը «Ամերիա» ընկերությունների խմբի իրավաբանական ծառայությունների գծով տնօրենն է:

15/06/2012-ից առ այսօր AMERIA GROUP (CY) LIMITED-ի տնօրենն է Անդրեյ Մկրտչյանը: Նա նաեւ «Ամերիաբանկ» ՓԲԸ-ի խորհրդի անդամ է  : Իսկ ովքեր են AMERIA GROUP ( CY ) LIMITED-ի բաժնետերերը: Այն ունի մեկ բաժնետեր` Կիպրոսում գրանցված մեկ այլ օֆշորային ընկերություն` MONTRAGO  NOMINEES  LIMITED: Այդ ընկերության բաժնետերերը չեն երեւում, կա մեկ լիազորված անձ` Կիպրոսի բնակիչ Անդրոյլա Պապադոպուլուն (ΑΝΔΡΟΥΛΛΑ  ΠΑΠΑΔΟΠΟΥΛΟΥ) :

Չնայած փաստաթղթերում նշված չէ, թե ովքեր են իրականում բանկի բաժնետերերը, սակայն հայտնի են գոնե նրանցից երկուսի անունները` գործարար, բարերար, «Ամերիաբանկ» ՓԲԸ-ի տնօրենների խորհրդի նախագահ Ռուբեն Վարդանյանը  եւ բանկի խորհրդի անդամ Նուբար Աֆեյանը :

Աշոտ Սուքիասյանը 4,6 մլն դոլար վարկ է վերցրել նաեւ «Պրոմեթեյ բանկ» ՍՊԸ-ից: Եթե քննիչը հարցաքննի «Պրոմեթեյ բանկ»-ի վաչության նախագահին, գուցե վերջինս համարձակություն ունենա ասելու, թե ով է այդ վարկի համար զանգել իրեն, եւ ինչպես է Սամվել (Նավասարդ) Կճոյանը այդ վարկի համար 4 անգամ այցելել  իրեն: Այնպես որ, օֆշորային գործի կծիկը բացելու բազմաթիվ «բանալիներ» կան: Այդ թվում՝ Աշոտ Սուքիասյանի ծախսերի մասին գրառումները: Ասենք, օրինակ, դրանցից մեկում նշված է` հինգ տոմս Դուբայի համար, Դուբայում հյուրանոցի ծախսեր: Եթե քննիչը պարզի, թե ով է եղել այդ հինգ հոգուց գոնե մեկը, դա էլ կարող է բանալի լինել:

Բայց բոլորս էլ գիտենք, թե նման գործերն ինչու չեն բացահայտվում Հայաստանում: Կոռուպցիայի դեմ պայքարելը դժվար գործ է, իսկ Հայաստանում՝ գրեթե անհնար, քանի որ բոլորն էլ նույն գործող անձինք են:  

Շարունակություն

Մեկնաբանություններ (5)

Gevorg
Էս պատմության բոլոր գլխավոր դերակատարները ՀՀԿ անդամ են ը զարմանալի է որ Գալուստն էլ է լռում,չնայած ինչպես միշտ երբ խոսքը գնում է թալանի կամ նետման պրոցեսի մասին ասում է ԴՈՒՔ ԻՐԱՎՈՒՆՔ ՉՈՒՆԵՔ ՀԱՐՑՆԵՔ ԹԵ ...............ինչպես եղավ Տարոնի միլիոնների մասին խոսելիս
Գեւորգ
Հարգելի Էդիկ, հիմա գոռա ու կանչիր ինչքան սիրտդ կկամենա - ,,А Васька слушает да ест!,, Այսինքն դրանց երեսներին թուքն ու մուրը որպես բարեբեր անձրեւ է ընկալվում: Բայց, վերջ թե առաջ մի օր պիտի բղավեն՝ դառն ու աղիօղորմ - այդ հաստատ կարելի է պնդել: Դուք Ձեր գործն արել եք!
Varujan
And why Catholicos is silent too? Kjoyan is his responsibility. If someone who works for you has allegedly involved in criminal activity you should investigate, unless of course you also have things to hide in your closet.
Վ.Առաքելյան
Կճոյանը սուրբ է ու հասկանալի է՝ հավատացյալ քննիչները կսարսափեն սուրբ մարդուն հետաքննելուց, սակայն զարմանալի է, ինչն է խանգարում ազգային ժողովի նախագահին ինքն իրեն և ձեռքի հետ էլ բոլոր երեսփոխաններին օրենքով սուրբ հայտարարելուն: Չե որ այդ ժամանակ էլ բոլոր քննիչները իրենք իրենց հավատացյալ կհայտարարեն և ամեն ինչ հարթ ու խաղաղ կփակվի, կմոռացվի:
Gegham
Իհարկե կարելի է անունների շարքը շարունակել,բայց մի հարց է իմ կարծիքով բոլորին հետաքրքրում,,,Ինչու մինչ օրս լռում է երկրի նախագահը կամ գոնե պարզաբանուներ չի անում նրա խոսնակը երբ խոսք է գնում բարձաստիճան չինովնիկների մասին. Հերթական անգամ օգտագործում են հին տակտիկան կխոսեն,կխոսեն ու կմոռանան,Էս ամենը < արվամոլություն > է մինիմում,դրա համար էլ շտապում են ստորագրել ԵՄ-ի հետ պայմանագիրը,որպիսի նման ձևի մտածողներին ասեն,,,Բա ափպեր ջան ԵՄ-ի մեջ ենք Ձեր մտածածը մեր մասին նորմալ ա

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter