Արմավիրի մարզի ընդհանուր իրավասության դատարանի Էջմիածնի նստավայրում այսօր շարունակվեց Արամ Մուղալյանի եւ նրա ընկերների դատավարությունը:

Գրավոր ապացույցների հրապարակման եւ հետազոտման փուլում ամբաստանյալներ Ռոբերտ Փիլոյանի եւ Գագիկ Առաքելյանի պաշտպան Մկրտիչ Դավթյանը միջնորդեց գործին կցված փորձագիտական եզրակացություններից մեկը հանել ապացույցների շարքից: Ըստ նրա` նախաքննության ընթացքում տուժող Սիաբանդ Խուդոյանն ասել է, որ «խոտի դեզը կերցրել եմ անասուններին, բայց նույն դաշտի խոտը իմ անասնագոմում շարված է, պետք եղած դեպքում կարող եմ նմուշ տրամադրել Ձեզ»:

Հիշեցնենք, որ Արամն ու իր ընկերները` Ռոբերտ Փիլոյանը, Գագիկ Առաքելյանը մեղադրվում են գույքի ոչնչացմամբ խուլիգանություն կատարելու եւ գույքը դիտավորությամբ ոչնչացնելու կամ վնասելու փորձ կատարելու հատկանիշներով, իսկ Արթուր Քլյանը` միայն խուլիգանության համար:

Պաշտպանն առանձնացրեց մի քանի հանգամանք, որը կարեւոր է գործի համար: Առաջին հանգամանքն այն է, որ տուժողը անասուններին կերակրել է այդ խոտով եւ խոտ չի մնացել, երկրորդը` փորձաքննության համար տրամադրվել է հարակից խոտի դեզից նմուշ, երրորդը` 29.03.2013թ. տուժողը նշել է, որ երկու երիտասարդի է տեսել տարածքում, որոնք դեպքի վայրից փախել-նստել են ավտոմեքենան, իսկ մեղադրյալները նախաքննության ժամանակ տվել են ցուցմունք, որ այդ օրը իրենք երեքով են եղել եւ չեն իմացել, թե որտեղ են գտնվել:

«Ստացվում է, որ դեպքի վայրում եղել են այլ անձինք, որոնք երկուսով են եղել եւ ոչ թե երեքով»,-ասաց փաստաբան Մկրտիչ Դավթյանը:

Դատավոր Խալաթյանը ցանկանում էր փաստաբանին հիշեցնել տուժող Սիաբանդ Խուդոյանի՝ դատարանում տված ցուցմունքը, ինչին փաստաբան Մ. Դավթյանը հակադարձեց, որ տուժողը տվել է հակասական ցուցմունքներ: Նա մեկ դրվագով ցույց տվեց, որ նույն փաստի վերաբերյալ իրար հակասող ցուցմունքներ կան, մասնավորապես` տուժող Ս. Խուդոյանն ասել է, որ ինքն է նկատել ավտոմեքենայի պետհամարանիշը եւ տրամադրել նախաքննական մարմնին, իսկ վկա Մրազ Մստոյանն էլ պնդել է, թե ինքն է տեսել ավտոմեքենայի պետհամարանիշը:

Որոշվեց հրապարակել տուժող Սիաբանդ Խուդոյանի նախաքննական ցուցմունքը, քանի որ նա խնդրել է դատական նիստերն անցկացնել առանց իր մասնակցության:

«Պաշտպանները միջնորդում են, թող իրենք էլ հրապարակեն, մեղադրողը խի՞ պիտի հրապարակի»,-ասաց մեղադրող Արսեն Աղաբեկյանը` ի պատասխան դատավորի պնդման, որ հրապարակի տուժողի ցուցմունքը: Վահե Խալաթյանը պնդեց, որ դա մեղադրող կողմի ապացույցն է, եւ նա պետք է հրապարակի: Սակայն պարզվեց, որ տուժողի նախաքննական ցուցմունքը մեղադրողի մոտ չկա: Դատավորը տրամադրեց իր մոտ եղածը, սակայն պարզվեց, որ սխալ ցուցմունք է տրամադրել Ա. Աղաբեկյանին, ինչից հետո հենց դատավոր Խալաթյանն էլ հրապարակեց Սիաբանդ Խուդոյանի նախաքննական ցուցմունքը:

Ցուցմունքը գրել էր անձամբ Սիաբանդ Խուդոյանը, եւ օգտագործած բառերը, դատավորի ասած` «մեկ բառում երեք ուղղագրական սխալները», ծիծաղ առաջացրին ներկաների մոտ: Դատավորը դժվարությամբ ընթերցեց տուժողի ցուցմունքը եւ վերջում հոգոց հանելով ասաց. «Լավ կլիներ, որ քննիչը գրեր»:

Փաստաբան Մկրտիչ Դավթյանը նշեց, որ քրեական գործը կազմվել է Քրեական դատավարության օրենսգրքի կանոնների կոպիտ խախտումներով, ինչի արդյունքում իր պաշտպանյալների նկատմամբ «ոչ միայն առաջադրվել է անհիմն մեղադրանք, այլեւ հետագայում վերաորակավորվել ու լրացվել է այդ մեղադրանքը»:

Արամ Մուղալյանի պաշտպան Անդրանիկ Հակոբյանն էլ միջնորդեց անթույլատրելի ճանաչել Արամ Մուղալյանի ավտոմեքենայի զննության վերաբերյալ կազմված արձանագրությունը, որն օգտագործվել է որպես ապացույց: Նա իր պնդումը հիմնավորեց Քրեական դատավարության օրենսգրքի 105 հոդվածի 1-ին մասի 3-րդ եւ 5-րդ կետերով, այն է` քրեական գործով վարույթում մեղադրանքի հիմքում չեն կարող դրվել եւ որպես ապացույց օգտագործվել այն նյութերը, որոնք ձեռք են բերվել` տվյալ քրեական գործով քրեական դատավարություն իրականացնելու, համապատասխան քննչական կամ այլ դատավարական գործողություն կատարելու իրավունք չունեցող անձի կողմից եւ քննչական կամ այլ դատավարական գործողության կատարման կարգի էական խախտմամբ:

Պաշտպանը նշեց, որ զննությունը քննչական գործողություն է, եւ այն կարող էր իրականացվել միայն քրեական գործ հարուցվելուց հետո, այնինչ իրականացվել է նյութերի նախապատրաստման ընթացքում նման իրավասություն չունեցող անձի` հետաքննիչի կողմից: Փաստաբանը մի շարք խախտումներ եւս նշեց:

Մկրտիչ Դավթյանն էլ նշեց, որ ավագ քննիչ Աշոտ Մարտիրոսյանն իր պաշտպանյալ Ռոբերտ Փիլոյանի նկատմամբ բռնություն է կիրառել Արմավիրի ՁՊՎ-ում: Վերջինս հարվածել է Ռոբերտի մարմնի տարբեր մասերին` պատճառելով մարմնական վնասվածքներ: Իրականացվել է փորձաքննություն, եւ փորձագետը հաստատել է, որ Ռոբերտ Փիլոյանը մարմնի տարբեր մասերին հասցված հարվածների հետեւանքով վնասվածքներ է ստացել: Ռոբերտը նույնպես հաստատեց, որ իրեն ծեծել են:

Պաշտպանի ասելով` հատուկ քննչական ծառայությունում նշված փաստով նյութեր նախապատրաստվել են, եւ մերժվել է Ռոբերտ Փիլոյանի հաղորդումը: Սակայն, որոշումը չի բողոքարկվել Ռոբերտի մայրիկի` Մարինա Հակոբյանի պահանջով, քանի որ վերջինս մտավախություն է ունեցել, որ անազատության մեջ գտնվող որդու հետ ավելի վատ կվարվեն:

Ավարտելով գրավոր ապացույցների հետազոտումը՝ դատարանն անցավ ամբաստանյալների հարցաքննությանը:

Գրավով ազատության մեջ հայտնված ամբաստանյալ Արթուր Քլյանի պաշտպանը նշեց, որ հաշվի առնելով Արթուրի առողջական վիճակը, վերջինս օգտվելով իր իրավունքից՝ հրաժարվում է ցուցմունքներ տալուց եւ հարցերին պատասխանելուց:

«Օրինակ նախորդ դատական նիստին Ձեր վատ զգալը ինձ համար ոչ թե տարօրինակ էր, այլ անսպասելի էր: Պատճառը չի երեւում, թե մարդը ինչու է վատ, այլ բան է, որ օդը չի հերիքում»,-զարմանք հայտնեց դատավոր Վ. Խալաթյանը եւ հետաքրքրվեց` արդյո՞ք ամբաստանյալը մտավախություն ունի, եւ ի՞նչն է դրա պատճառը: Արթուր Քլյանը հաստատեց, որ մտավախություն ունի:

Ցուցմունքներ տվեցին ամբաստանյալներ Արամ Մուղալյանը, Ռոբերտ Փիլոյանն ու Գագիկ Առաքելյանը: Ամբաստանյալներից եւ ոչ մեկը չընդունեց իրեն առաջադրված մեղադրանքը՝ այն որակելով «աբսուրդ»:

Արամ Մուղալյանը նշեց, որ ինքը սիրում է ավտոմեքենայով ճամփորդել, զբոսնել եւ այդ նպատակով շատ վայրեր է հաճախում: Ասաց նաեւ, որ սիրում է ավտոմեքենան վարել շատ արագ եւ դրանից հաճույք է ստանում: Ըստ նրա, բացի Սյունիքի մարզից՝ Հայաստանի բոլոր մարզերում եղել է: Նա պատմեց, որ դեպքի օրը ընկերների հետ եղել է Արմավիրի մարզում, սակայն նշեց, որ չի ճանաչում Սիաբանդ Խուդոյանին եւ իրեն մեղսագրվող արարքի հետ բացարձակ կապ չունի:

Արամը հրաժարվեց պատասխանել դատավորի եւ մեղադրողի հարցերին՝ պատճառաբանելով, որ վերջիններս այս գործով անաչառ չեն, ինչի ապացույցը իրեն անձնական երաշխավորությամբ ազատ արձակելու մասին միջնորդությունների անհիմն մերժումն է:

«Ես հարցեր չեմ տա, որ տհաճություն չպատճառեմ»,- հեգնանքով ասաց դատավոր Վահե Խալաթյանը:

Գագիկ Առաքելյանը նշեց, որ ինքը Ռոբերտ Փիլոյանի ընտանիքի անվտանգության աշխատողն է: Ըստ նրա` դեպքի օրը ինքը պարզապես Ռոբերտին է ուղեկցել եւ չի էլ իմացել, թե ուր են գնում: Նույնիսկ ավտոմեքենայից չի իջել, քանի որ ավտոմեքենայում է եղել նաեւ Ռոբերտը: Մի քանի վայրկյանով` բնական կարիքները հոգալու նպատակով ավտոմեքենայից իջել է միայն Արամ Մուղալյանը:

«Մեքենայի մեջ եմ եղել, միայն օդ եմ շնչել, այլ գործողություն չեմ իրականացրել,-ասաց Գագիկը եւ հավելեց,- եթե իմանայի այդպես է լինելու, օդ էլ չէի շնչի: Կես տարի նստած եմ, բայց չգիտեմ ինչի համար»:

Գագիկ Առաքելյանը համեմատության համար ասաց, թե վախենալով է նաեւ երթուղային տաքսի նստելու, քանի որ եթե վարորդն իջնի, ինքն էլ պետք է իջնի, որպեսզի վարորդը հանցագործություն չանի ու արդյունքում իրեն մեղադրեն: «Չափազանցնում եք,-պատասխանեց դատավորը եւ հավելեց,- դրա համար իմացեք, թե ում հետ եք մարշուտկա նստում»:

Ռոբերտ Փիլոյանը եւս հրաժարվեց մողադրող դատախազի հերցերին պատասխանելուց: Իսկ առհասարակ նա դժվարանում էր խոսել առողջական խնդիրների պատճառով, փոխարենը պատասխանեց դատավորի հարցերին: Վահե Խալաթյանը ամբաստանյալից հետաքրքրվեց, թե «ինչու են շատերը գալիս Արմավիրի մարզ ու մեղադրվում»: Հարցին պատասխան չհնչեց:

Աշխատանքային օրն ավարտվեց: Դատական նիստը կշարունակվի երկուշաբթի: