ԱԺ պատգամավոր, նախկին վարչապետ Հրանտ Բագրատյանը ֆեյսբուքյան իր էջում անդրադարձել է ԱՄՆ, Չինաստանի և ՀՀ-ի տնտեսական աճին և գազի գնին: Հ. Բագրատյանի գրառումը ներկայացնում ենք նույնությամբ.

«Երեկ չէ մյուս օրը հայտնի դարձավ, որ ԱՄՆ տնտեսությունն այս տարվա 3-րդ եռամսյակում աճել է 3.6 %-ով։ Սա եռամսյակային աճի ռեկորդներից մեկն է վերջին 9 տարիների համար։ Չինաստանի տարեկան տնտեսական աճն էլ ճշտվել է` 7.8%։

Մինչդեռ ՀՀ 2014թ. բյուջեն ներկայացնելիս վարչապետն ԱԺ-ում հայտարարեց, որ ՀՀ խոստացված տնտեսական աճը չի ստացվում, քանի որ համաշխարհային տնտեսության աճը դանդաղել է։ Պարզապես ստում էր։

Կիևում շատ, շաաաաատ մարդիկ հավաքվել են Մայդանում և փոփոխություններ են ուզում։ Նրանք էլեկտրաէներգիայի համար վճարում են 13.7 դրամ (Հայաստանում՝ 37), գազի համար այստեղ վճարում են 35.5 հազար դրամ (Հայաստանում 158000 դրամ), իսկ եթե շատ –շաաատ ես վառել (տես` նախորդ գրառումս)՝ ընդամենը 53.7 հազար դրամ։

Հայաստանում մենք գազի համար վճարում ենք 158000 կամ 391 դոլար, եթե դարձնում ենք եվրոպական կալորիականության՝ 496 դոլար, իսկ եթե նկատի ունենանք, որ ըստ էներգետիկայի նախարարի այդ ամենը վճարելուց հետո էլ 90 դոլար պարտք ենք մնում ՌԴ-ին` 586 դոլար։ Մինչդեռ իբր թե մենք գազը 2.3 անգամ ավելի էժան ենք ստանում։ Ի՞նչ կլիներ, եթե այս ամենը Մայդանի ժողովուրդն իմանար»,- գրում է Հ.Բագրատյանը։