Այսօր նախկին հանրապետական եւ ԱԺ խոսնակ, այժմ անկախ պատգամավոր Տիգրան Թորոսյանն անդրադարձավ Գալուստ Սահակյանի եւ երեք հանրապետական պատգամավորների այն հայտարարությանը, թե ԱԺ նախագահի պաշտոնից հրաժարվելու քայլը Թորոսյանի էմոցիոնալ լինելու հետեւանքն է: Տիգրան Թորոսյանը գտնում է, որ մարդիկ ռոբոտ չեն, ուստի պետք է աշխատեն ե´ւ սրտով, ե´ւ մտքով: «Սա նորմալ մարդու պահվածք է»,- ասում է նա եւ նկատում, որ 4-5 ամիս գործընթացը շարունակվում էր եւ անգամ ամենաէմոցիոնալ մարդն այդ ընթացքում կարող էր հանգիստ կշռադատել եւ որոշում ընդունել. «Իսկ այդ հայտարարությունները մեկ բանի հետեւանք էին. մարդիկ բան չունեին ասելու, դա ասացին»: Թորոսյանը նշում է, որ ինքը հանգիստ վերաբերվեց մամուլում պատվիրված բոլոր նյութերին, ինչն էլ ապացուցում է էմոցիաների մասին խոսքերի ավելորդությունը: «Ես ամեն ինչին կարող եմ հանգիստ վերաբերվել»,- ասում է նա: Թորոսյանը կարեւորում է այն հանգամանքը, որ խորհրդարանում շատ մեծ թվով հանրապետականներ կան, սակայն նրանց մեծամասնությունը չմեկնաբանեց իր հրաժարականի փաստը. «Ուրեմն, սա ինչ-որ բանի մասին խոսում է»,- համոզված է ԱԺ նախկին խոսնակը: Ըստ նրա` վերոհիշյալ հայտարարություններով մի քանի հոգի ուղղակի փորձեցին լուծել իրենց խնդիրները: