«Միացում» շարժման ներկայացուցիչներ Ժիրայր ՍԵֆիլյանը, Զարուհի Փոստանջյանը, Ալեքսանդր Քանանյանը «Ուրբաթ» ակումբում այսօր լրագրողներին ներկայացրին այն խոչընդոտները, որոնց առնչվել են Էջմիածին, Արմավիր քաղաքներում կայանալիք հանդիպումների ժամանակ:Զարուհի Փոստանջյանը տեղեկացրեց, որ երկու դեպքում էլ նախօրոք պայմանավորվածություն ունեին քաղաքապետարանի հետ միջոցառումը անցկացնելու համար, միջոցառման շրջանակներում նախատեսված էր Տիգրան Խզմալյանի «Արաքսից Կուր, Արցախից Ջավախք» ֆիլմի ցուցադրությունը, Ալեքսանդր Քանանյանի դասախոսությունը: Էջմիածնում Ազգային անվտանգության ծառայությունը միջամտել եւ թույլ չի տվել անցկացնել նախատեսված միջոցառումը: Արմավիրի մշակույթի պալատում կայանալիք միջոցառմանը խոչընդոտել են ոստիկանները` շրջափակելով մշակույթի պալատի շրջակայքը: Նրանք թույլ չեն տվել, որ Արմավիրի բնակիչները մասնակցեն միջոցառմանը: Կազմակերպիչները միջոցառումը շարունակել են երթով՝ վանկարկելով«Արցախ, Հայաստան, Միացում»: Ազգային ժողովի պատգամավոր, «Ժառանգություն» խմբակցության անդամ Զարուհի Փոստանջյանը այս ամենից հետո, որպես պատգամավոր, դիմել է ԱԺ նախագահ Հովիկ Աբրահամյանին: Դիմելու համար, ինչպես նշում է Զ. Փոստանջյանը, հիմք է հանդիսացել Աբրահամյանի խոստումը, թե ինքը կնպաստի, որպեսզի ազատ արտահայտվեն կարծիքները: Հովիկ Աբրահամյանն ասել է, որ հանդիպելու է նախագահին եւ այդ մասին կխոսի նախագահի հետ, խոստացել էր խոսել նաեւ Ազգային անվտանգության ծառայության պետ Գորիկ Հակոբյանի հետ: Սակայն Հովիկ Աբրահամյանը Փոստանջյանին զանգահարել եւ ասել է, որ պետք չէ միջոցառում անցկացնել, քանի որ նախագահը պատրաստվում է հանդիպել «Միացում» նախաձեռնության անդամներին եւ լսել նրանց տեսակետը: Հովիկ Աբրահամյանը Զարուհի Փոստանջյանին նաեւ ասել է, որ «Միացում» նախաձեռնությունը Լեւոն Տեր-Պետրոսյանի ստեղծած ձեւաչափն է, ուղղակի իրենք էլ չեն գիտակցում այդ փաստը: Զարուհի Փոստանջյանն այսօր եւս մեկ անգամ պարզաբանեց, որ իրենց նախաձեռնությունն ազգային է, այլ ոչ թե մեկի ծրագիրը, ձեւաչափը վերկուսակցական է, վերքաղաքական: Ժիրայր Սեֆիլյանն էլ նշեց, որ բնակչության հետ հանդիպումները շարունակվելու են թե՛ Հայաստանի շրջաններում, թե՛ Արցախում: Հարցին, թե չեն պատրաստվու՞մ դիվիդիներով շփվել ժողովրդի հետ, պատասխանեց, որ եթե շարունակվի ձեւաչափի գործունեության խոչընդոտումը, ապա իրենք պատրաստ են նման քայլի գնալ: