Նոյեմբերի 15-ի լույս 16-ի գիշերը ժամը 4-ի սահմաններում ադրբեջանական հատուկ նշանակության ջոկատը հատելով հակամարտության գոտու հարավ-արեւելյան հատվածը փորձել է թափանցել Աշաղը Սեյիդահմեդլու բնակավայրի ուղղությամբ տեղաբաշխված ղարաբաղյան դիրքապահների թիկունքը: Այս մասին տեղեկացրել են ԼՂՀ պաշտպանության նախարարության մամուլի ծառայությունից: Դա այս տավա մարտի 3-ի լույս 4-ի գիշերը Մարտակերտի շրջանի Լեւոնարխ գյուղի ուղղությամբ հակառակորդի ձեռնարկած դիվերսիոն գործողությունից հետո սահմանային հերթական լուրջ միջադեպն էր: Մարտական հերթապահություն իրականացնող հայ զինվորներն անցել է պաշտպանության, եւ շուրջ 30 րոպե տեւած ինտենսիվ մարտերից հետո հակառակորդը` մարտադաշտում թողնելով մեկ սպանված, նահանջել է իր ելման դիրքերը: Մեր կողմից կորուստներ չկան: ԼՂՀ պաշտպանության նախարարությունը ուշադրություն է հրավիրում հատկապես այն փաստի վրա, որ ադրբեջանական կողմն իր այս ագրեսիվ գործողությունը ձեռնարկել է հենց այն պահին, երբ բանակցային գործընթացի շրջանակներում Ստեփանակերտում էին գտնվում ԵԱՀԿ Մինսկի խմբի համանախագահները: