Օրերս ԼՂՀ նախագահ Բակո Սահակյանի եւ տեղական ինքնակառավարման մարմինների ղեկավարների հետ հանդիպման ժամանակ մի քանի համայնքի ղեկավարներ բարձրացրեցին գյուղատնտեսական ապրանքների իրացման հարցը: Նման հարց բարձրացվեց նաեւ նախագահի Քաշաթաղի եւ Շահումյանի շրջաններ կատարած այցերի ժամանակ: Գյուղմթերքների իրացման խնդիր, ըստ ԼՂՀ փոխվարչապետ, գյուղնախարար Արմո Ծատուրյանի, չկա, քանի որ մի քանի ամիս առաջ շահագործման է հանձնվել նորագույն տեխնոլոգիաներով հագեցած պահածոների «Արցախֆրուտ» գործարանը: «Արցախֆրուտն» արդեն մթերել է մոտ 500 տոննա բանջարեղեն, միրգ եւ հատապտուղներ: «Թողարկվող արտադրանքի տեսականին 3 տասնյակից ավելի է»,-տեղեկացրել է Ա.Ծատուրյանը: Հետքի հետ զրույցում գյուղնախարարը տեղեկացրել է, որ վերանորոգման փուլում է գտնվում նաեւ Ստեփանակերտի կաթի կոմբինատը, որը կաթի ընդունման կետեր կունենա հանրապետության տարբեր բնակավայրերում: «Ղարաբաղում առաջիկայում այլեւս գյուղմթերքների իրացման խնդիր չի լինելու»,-հավաստել է նա: ԼՂՀ Ազգային վիճակագրական ծառայության տվյալներով, նախորդ տարվա համեմատ զգալի աճ է արձանագրվել գյուղատնտեսության ոլորտում: Համախառն արտադրանքը 2008-ի հունվար-սեպտեմբերին, փաստացի գներով, կազմել է 23 մլրդ 638 մլն դրամ, որը նախորդ տարվա նույն ժամանակահատվածի համեմատ աճել է մոտ 40 տոկոսով: