Ամերիկահայ բարերարներ Ջորջ եւ Քերոլայն Նաջարյանների առանձնապես խոշոր չափերի գույքին խարդախությամբ տիրանալու համար Գրիգոր Իգիթյանին առաջադրվել էր մեղադրանք: Այս տարվա սեպտեմբերի 13-ին մեկուկես տարվա դատաքննությունից հետո Կենտրոն եւ Նորք-Մարաշ համայնքների ընդհանուր իրավասության դատարանը նրան դատապարտեց 4,5 տարվա ազատազրկման (Տես` Իգիթյանը դատապարտվեց 4,5 տարվա ազատազրկման): Բայց Գ. Իգիթյանը մինչ օրս ազատության մեջ է, որովհետեւ մինչ դատավճռի օրինական ուժ ստանալը, դատավոր Ժորա Վարդանյանի որոշմամբ մեղադրյալի նկատմամբ ընտրված խափանման միջոցը` ստորագրություն չհեռանալու մասին, մնացել է անփոփոխ: Ինչպես եւ սպասվում էր, Իգիթյանը ներկայացրել է վերաքննիչ բողոք, եւ այսօր վերաքննիչ դատարանում պետք է սկսվեր բողոքի քննությունը: Սակայն մեղադրող-դատախազի բացակայության պատճառով նիստը հետաձգվեց: Դատավարությունը կշարունակվի նոյմբերի 17-ին: