Տեսանյութեր
Լուսանկարներ
Համագործակցության հուշագիր ՀՀ եւ ԼՂՀ դատախազությունների միջեւ
Այսօր Ստեփանակերտում ՀՀ գլխավոր դատախազ Աղվան Հովսեփյանը եւ ԼՂՀ գլխավոր դատախազ Արշավիր Ղարամյանը հանդիսավոր պայմաններում ստորագրել են Համաձայնագիր-Հուշագիր, որի դրույթների հիման վրա այսուհետեւ երկու հայկական հանրապետությունների դատախազությունները պետք է համագործակցեն հանցագործությունների նախազգուշացման, կանխարգելման, հայտնաբերման, բացահայտման եւ քննության ուղղությամբ:
ԼՂՀ Դատախազության մամուլի ծառայության գնահատմամբ՝ Համաձայնագրի մի յուրահատկությունն այն է, որ բացի փոխադարձ իրավական օգնություններից, ՀՀ Գլխավոր դատախազությունը միջնորդություն է ստանձնում ԼՂՀ Գլխավոր դատախազությանը այլ պետությունների իրավապահ մարմինների կողմից անհրաժեշտ աջակցություններ ստանալու հարցում, ինչը ԼՂՀ միջազգային չճանաչվածության պարագայում առանձնակի նշանակություն ունի:
ՀՀ գլխավոր դատախազ Աղվան Հովսեփյանը, կարեւորելով համաձայնագրի նշանակությունը, նշել է, որ առ այսօր ՀՀ եւ ԼՂՀ դատախազությունների համագործակցությունը կայացել է այն բոլոր սկզբունքների հիման վրա, որոնք գոյություն ունեն միջազգային չափանիշներով համընդունված փաստաթղթերում: Այս նկատառմամբ ՀՀ գլխավոր դատախազը արժեւորել է համաձայնագիրը՝ շեշտելով, որ դա ոչ միայն երկու երկրների դատախազությունների, այլեւ ՀՀ եւ ԼՂՀ իրավապահ ոլորտի համալիր փոխգործակցությունը կարգավորող փաստաթուղթ է:
Իր հերթին ԼՂՀ գլխավոր դատախազ Արշավիր Ղարամյանը համոզմունք է հայտնել, որ համաձայնագրի ստորագրմամբ համագործակցության նոր փուլ է բացվում, որի կարիքը ԼՂՀ դատախազությունն առավելապես ունի: Նա շնորհակալություն է հայտնել ՀՀ Գլխավոր դատախազին համաձայնագրի ստեղծման գաղափարին ընդառաջելու եւ գործուն աջակցություն ցուցաբերելու համար:
Համաձայնագրի ստորագրումից հետո Աղվան Հովսեփյանը ՀՀդատախազության պատվավոր աշխատողի կրծքանշան է հանձնել ԼՂՀ գլխավոր դատախազ Արշավիր Ղարամյանին եւ նրա տեղակալ Վալերի Մեսրոպյանին: Ինչպես նշել է ՀՀ գլխավոր դատախազը, մինչ այդ Հայաստանից դուրս ընդամենը 3 հոգի են արժանացել այդ կրծքանշանին:
ԼՂՀ գլխավոր դատախազը, «գնահատելով Աղվան Հովսեփյանի անուրանալի ծառայություններն Արցախին, հատկապես իրավապահ ոլորտում», նրան է հանձնել Ղարաբաղի խորհրդանիշը համարվող «Մենք ենք, մեր սարերը» հանրահայտ կոթողի արծաթաձույլ մանրակերտը:
Այնուհետու ՀՀ գլխավոր դատախազը արցախցի իր գործընկերներին համառոտ ներկայացրել է Հայաստանի Հանրապետությունում իրականացված դատաիրավական բարեփոխումների արդյունքները, պարզաբանել դրանց կիրառական նշանակությունը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել