Տեսանյութեր
Լուսանկարներ
Սերժ Սարգսյան. «Վտանգի գնահատումը չի կարող լինել դոգմատիկ»
Նախագահ Սերժ Սարգսյանի այսօր անցկացրել է աշխատանքային խորհրդակցություն, որի ընթացքում քննարկվել են պաշտպանական ռազմավարական վերանայման գործընթացի առաջին փուլի արդյունքները: Հինգ փուլից բաղկացած այս գործընթացը նախատեսված է, որ կավարտվի մինչեւ 2010թ. ապրիլ ամիսը: Այս մասին հաղորդում է նախագահի մամլո գրասենյակը:
Խորհրդակցության ժամանակ պաշտպանության նախարար Սեյրան Օհանյանը զեկուցել է պաշտպանական ռազմավարական աշխատանքները համակարգող միջկառավարական հանձնաժողովի աշխատանքի առաջին փուլի` ՀՀ անվտանգության միջավայրի եւ սպառնալիքների գնահատման փաստաթղթի նախագծի մշակման մասին եւ ընդգծել, որ այն նպատակ է հետապնդում ապահովել առկա եւ հավանական սպառնալիքներին համարժեք պաշտպանական ոլորտի հեռանկարային զարգացումը:
Առաջարկվող փաստաթղթի վերաբերյա մասնակիցները ներկայացրել են իրենց նկատառումներն ու տեսակետները: Իսկ նախագահ Սարգսյանը, ամփոփելով աշխատանքները, ասել է, որ վտանգի գնահատումը չի կարող լինել դոգմատիկ: Ըստ նրա` որոշակի ժամանակահատվածի կտրվածքով այն պետք է վերանայվի ու վերագնահատվի, իսկ գնահատականների հիմք հանդիսացած վերլուծությունները մշտապես պետք է թարմացվեն:
Երկրի ղեկավարի գնահատմամբ, նման մասշտաբի աշխատանք առաջին անգամ է կատարվում, առնվազն գոնե այսպիսի համակարգված հարթության մեջ եւ այն կարելի է ընդունել որպես հիմք: Իսկ հաջորդ փուլերում հանձանժողովը պետք է ձեռնամուխ լինի պլանավորման ղեկավար փաստաթղթերի մշակմանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել