«Ժառանգություն» խորհրդարանական խմբակցության ղեկավար Արմեն Մարտիրոսյանը այսօր Դե ֆակտո ակումբում ասել է, թե Հայաստանի դիրքերի կարուստը ԵԽ-ում կարող է հանգեցնել հեղինակության կորստի նաև այլ միջազգային կազմակերպություններում, քանի որ «միջազգային բոլոր կառույցները կապված են միմյանց հետ, և դիրքերի կորուստը դրանցից մեկում կարող է նշանակել կորուստ նաև մյուսներում: Եթե հայկական պատվիրակությունը զրկվի ձայնի իրավունքից ԵԽԽՎ-ում, ապա միջազգային ֆինանսական կառույցները, հնարավոր է, դադարեցնեն աջակցություն ցուցաբերել մեզ»: Ա. Մարտիրոսյանը գտնում է, որ  ԵԽ-ում  անդամակցությունը Հայաստանի անվտանգության ամրապնդման խնդիրն է լուծում.«Քաղաքականապես մեկուսացված պետությունը չի կարող դիմակայել արտաքին մարտահրավերներին»։ Խմբակցության նախագահը  գտնում է, որ պետք է իրականացնել բազմավեկտոր  քաղաքականություն,  եւ անհիմն է համարում, երբ քաղաքական գործիչները Հայաստանը համեմատում են Ռուսաստանի հետ. «Հայաստանն իր աղքատ բնական պաշարներով և Լեռնային Ղարաբաղի խնդրով չի կարող թույլ տալ իրեն անտեսել միջազգային կառույցների գնահատականները»: Բանախոսը խորհուրդ է տալիս  իշխանություններին  դեպքերի նման զարգացումը կանխելու համար դուրս գալ սեփական շահերի շրջանակներից. «Իշխանությունները պետք է կարողանան վեր կանգնել իրենց նեղ անձնական շահերից ու կատարել քայլեր, որոնք որակական փոփոխություն կբերեն»: Ըստ  խմբակցության նախագահի`  ԵԽԽՎ երկու բանաձևերն էլ մեծամասամբ կատարված չեն,  այլ միայն որոշակիորեն կատարված է մարտի 1-ի դեպքերն անաչառ ուսումնասիրելուն ուղղված քայլը. «Ստեղծվել է Փաստահավաք խումբ, ինչը ապահովում է անաչառության նվազագույն շեմը»։ Սակայն, ըստ նրա, քաղբանտարկյալների հարցը եղել և մնում է. «10 անմեղ զոհերի սպանության հանգամանքների բացահայտման ուղղությամբ որևէ քայլ չի արվել, որևէ մեկը դրա համար չի ձերբակալվել, երբ հայտնի է,  բազմակարծության և ազատ լրատվամիջոցներ ունենալու ուղղությամբ տեղաշարժ չկան, հետաձգվել է հաճախությունների տրամադրման մրցույթը մինչեւ  2010թ»։ Արմեն Մարտիրոսյանը գտնում է, որ  ելքը ձերբակալվածներին ազատ արձակելն է: