Օրերս ԼՂՀ վարչապետի մոտ տեղի ունեցած խորհրդակցության ընթացքում քննարկման թեման դարձյալ գյուղատնտեսական ծրագրերն էին: Ինչպես տեղեկացնում են ԼՂՀ կառավարության տեղեկատվության եւ հասարակայնության հետ կապերի վարչությունից,  Արա Հարությունյանը դժգոհություն է հայտնել պետական ծրագրերը բնակչությանը ճիշտ եւ ժամանակին  մատուցելու` վարչակազմերի ղեկավարների ու գյուղապետերի աշխատանքի առնչությամբ: Արդյունքում, գյուղացիների մեծ մասը  անտեղյակ է  պետության կողմից իրականացվող  ծրագրերից: Իսկ հողամշակների տեղեկացվածության ցածր մակարդակը խոչընդոտում է գյուղատնտեսական ծրագրերի իրագործմանը, քանի որ նրանք հրաժարվում են հող մշակել, խուսափում` գյուղատնտեսական աշխատանքներից եւ այլն: Վարչապետը հանձնարարեց այդ ուղղությամբ համապատասխան աշխատանքներ տանել բնակչության շրջանում: Խորհրդակցության ընթացքում գյուղնախարար Արմո Ծատուրյանը ներկայացրեց 2009 թվականին գյուղատնտեսության ոլորտում  իրականացվելիք կարեւոր  միջոցառումները: Պետությունը կշարունակի խթանել հացահատիկի արտադրությունը` 350 միլիոն դրամ  ուղղելով սեւ ցելի աշխատանքներին: Աջակցություն կցուցաբերվի եգիպտացորեն մշակողներին եւ պետական պահուստային հողերի` սեւ ցել կատարող վարձակալներին: Անտոկոս վարկի տեսքով  հողօգտագործողներին կտրամադրվի 3 հազար տոննա ազոտական պարարտանյութ եւ մոտ 300 տոննա կարտոֆիլի տնկանյութ: Անասնապահության զարգացման համար կհատկացվեն վարկային միջոցներ, կշարունակվի լիզինգի կարգով նոր գյուղտեխնիկայի տրամադրումը: Վարկային միջոցներ են նախատեսվում նաեւ գյուղմթերքի մթերման, վերամշակման, արտադրական ենթակառուցվածքների զարգացման համար: Ստեփանակերտի կաթի կոմբինատի վերագործարկումից հետո կստեղծվեն կաթի ընդունման եւ սառեցման կետեր: Ոռոգման կայուն համակարգը  կթույլատրի ոռոգովի դարձնել մինչև 12 հազար հա հողատարածություն: