Հեռուստառադիոհաճախականություններ չեն տրամադրվի
Կառավարության այսօրվա նիստին Էկոնոմիկայի փոխնախարար Վահե Դանիելյանը ներկայացրեց «Հեռուստատեսության եւ ռադիոյի մասին ՀՀ օրենքում փոփոխություն կատարելու» ՀՀ օրենքի նախագծի վերաբերյալ Կառավարության եզրակացությունը: Այն բացասական է:
«Մենք համարում ենք, որ դա չի բխում ՀՀ Ազգային ժողովում հաստատված ՀՀ Կառավարության ծրագրից, ըստ որի, կապի բնագավառում պետք է ներդրվի ռադիոհաղորդումների եւ հեռուստահաղորդումների հեռարձակման թվային համակարգ»,-նշեց Վ. Դանիելյանը եւ հավելեց, որ ներկայումս գործում է միջգերատեսչական հանձնաժողով, որը մշակում է չափորոշիչներ. «Հանձնաժողովում որոշում է ձեռք բերվել, որ մեզ կմիանան Եվրամիության փորձագետները, որպեսզի այդ չափորոշիչները լինեն լավագույնս եւ գործընթացը սահուն կազմակերպեն»:
Ելնելով այս ամենից` Վ. Դանիելյանը օրենքի նախագիծը որակեց որպես հետընթաց քայլ է. «Մենք պնդում ենք, որպեսզի մնա նախորդ փոփոխությունը` 2008թ սեպտեմբերի 10-ի, ըստ որի, մենք մարատորիա ենք առաջարկում, որ մինչեւ 2010թ հունիսի 20-ը որեւիցէ տենդեռներ չկազմակերպվեն հեռուստառադիոհաճախականությունների տրամադրման առումով, որպեսզի հավասարություն ապահովենք բոլոր ընկերությունների համար»:
Փոխնախարարն ասաց, որ բոլոր շահագրգիռ գերատեսչությունների եզրակացություններն էլ բացասական են: Վարչապետը հետաքրքրվեց, թե երբ են Եվրամիության փորձագետները միանալու աշխատանքային խմբին:
«Այս տարվա ընթացքում»,-պատասխանեց փոխնախարարը եւ հավելեց, որ հստակ ժամկետներ չկան:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել