Էջմիածինցի 24-ամյա Սուրեն Մովսիսյանի սպանությունն առայսօր բացահայտված չէ: Հիշեցնենք, որ երիտասարդին սպանել էին 2008թ. հոկտեմբերի 12-ին, քաղաքի կենտրոնական փողոցներից մեկում` հրազենից արձակած յոթ կրակոցներից: Փաստի առիթով ոստիկանության Էջմիածնի քննչական բաժնում հարուցվել էր քրեական գործ ՀՀ քր.օր-ի 104 հոդվածի 1-ին մասի հատկանիշներով: Մարդասպանի մասին խոսակցություններում շրջանառվում էր  գեներալ, ԱԺ պատգամավոր Սեյրան Սարոյանի թիկնազորի անդամ Ատամանի` Արմենի  անունը: Այդ ժամանակ նրան նույնիսկ ձերբակալեցին: Էջմիածնի քննչական բաժն Հետքի աղբյուրը տեղեկացրեց, որ սպանությանը նրա մասնակցությունը  չի հիմնավորվել: Նրան ձերբակալել էին խուզարկությամբ տնից ապօրինի զենք-զինամթերք հայտնաբերելու համար: Նույն աղբյուրի հաղորդմամբ` Ատամանի մասով գործն առանձնացվել է և ուղարկվել դատարան: Իսկ սպանության փաստով վարույթը կասեցվել է: