ԼՂՀ կառավարության աշխատակազմի ազգային փոքրամասնությունների եւ կրոնի հարցերի բաժնի պետ Աշոտ Սարգսյանի խոսքերով, Արցախում գործում են 11 կրոնական կազմակերպություններ, որոնց «մայր» կազմակերպությունները ՀՀ-ում ունեն պետական գրանցում: «Խղճի ազատության եւ կրոնական կազմակերպությունների մասին» ԼՂՀ օրենքն ուժի մեջ է մտել 2009թ. հունվարի 9-ին: Այդ օրվանից վեցամսյա ժամկետում Ղարաբաղում գործող կրոնական կազմակերպությունները պարտավոր են գրանցվել: ԼՂՀ պետռեգիստրի կողմից 2009թ. մարտի 19-ին գրանցվել է «Արցախի Հայ Կաթողիկե եկեղեցի» կրոնական կազմակերպությունը: Հունվարի 24-ին վերոնշյալ բաժին են դիմել «Եհովայի վկաներ» կրոնական համայնքի ներկայացուցիչները եւ ստացել պետական գրանցման համար նախատեսված բոլոր փաստաթղթերը, սակայն, Ա.Սարգսյանի հավաստմամբ, բաժնին եւ պետռեգիստրին փաստաթղթեր չեն ներկայացրել` փորձագիտական եզրակացություն ստանալու եւ գրանցվելու համար: «ԼՂՀ Ավետարանի Հավատքի Քրիստոնյաների «Արթնության Կրակ» եկեղեցի» կրոնական կազմակերպությունը ազգային փոքրամասնությունների եւ կրոնի հարցերի բաժնի կողմից փորձագիտական բացասական եզրակացություն է ստացել եւ զրկվել պետական գրանցում ստանալու հնարավորությունից: Աշոտ Սարգսյանը «Ազատ Արցախ» թերթում նշել է, որ «օրենքով սահմանված կարգի համաձայն, ուսումնասիրելով նշված կազմակերպության ներկայացուցիչների խմբի կողմից ներկայացված փաստաթղթերը եւ ունենալով բավարար տվյալներ այդ կրոնական կազմակերպության` Արցախում ավելի քան 9 տարիների գործունեության մասին, փորձագիտական խումբը գտել է, որ  «Արթնության Կրակ» կրոնական համայնքի սպասավորները հավատացյալների նկատմանբ կիրառում են հոգեբանական ազդեցության մի շարք մեթոդներ, որոնք հակասում են ԼՂՀ Սահմանադրության հոդված 19-ի 1 կետին եւ «Խղճի ազատության եւ կրոնական կազմակերպությունների մասին» ԼՂՀ օրենքի հոդված 3-ի 1 կետին»: