Կոալիցիան խնդրում է Արմեն Ռուստամյանին և Արթուր Աղաբեկյանին շարունակել զբաղեցնել իրենց պաշտոնները
Հովիկ Աբրահամյանն այսօր Ազգային ժողովի նիստի ժամանակ հայտարարել է, որ քաղաքական կոալիցիան խնդրում է Դաշնակցությանը, որպեսզի Արմեն Ռուստամյանը և Արթուր Աղաբեկյանը հետ վերցնեն իրենց հրաժարականի դիմումները և շարունակեն զբաղեցնել իրենց պաշտոնները ԱԺ-ում:
Հիշեցնենք, որ Արմեն Ռուստամյանը ԱԺ արտաքին հարաբերությունների մշտական հանձնաժողովի նախագահն է, իսկ Արթուր Աղաբեկյանը` ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահը:
Դաշնակցությունից Վահան Հովհաննիսյանը շնորհակալություն է հայտնել առաջարկի համար և պատասխանել, որ առաջարկը կքննարկեն և պատասխանը կներկայացնեն ԱԺ նախագահին:
ԱԺ փոխնախագահ Հրայր Կարապետյանի պաշտոնում մնալու մասին Հովիկ Աբրահամյանը ոչինչ չի ասել:
ՀՀ խորհրդարանը ունեցել է նախադեպեր, երբ հանձնաժողովների նախագահների պաշտոնները զբաղեցրել են ընդդիմության ներկայացուցիչներ: ԱԺ-ն 2008թ-ին սահմանել էր բանաձև, որը թույլ է տալիս ընդդիմության գործիչներին զբաղեցնել հանձնաժողովի նախագահի և տեղակալի պաշտոններ:
Այս փոփոխությունը, սակայն, գործելու է հաջորդ գումարման խորհրդարանի համար, այնինչ կոալիցիոն ուժերն այսօր արդեն կոչ են անում Արթուր Աղաբեկյանին և Արմեն Ռուսամյանին հետ վերցնել հրաժարականի մասին դիմումները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել