Ստեփանակերտի փողոցներն այսօր առավել քան մարդաշատ են վաղ առավոտից. բոլորը դուրս են եկել իրար շնորհավորելու` Հայրենական մեծ պատերազմի հաղթանակի, Լեռնային Ղարաբաղի Հանրապետության պաշտպանության բանակի օրվա եւ Շուշիի ազատագրման 17-րդ տարեդարձի կապակցությամբ: Առավոտից Ստեփանակերտի հուշահամալիր են այցելել նաեւ ԼՂՀ եւ ՀՀ բարձրաստիճան այրերը` երկու հանրապետությունների նախագահների գլխավորությամբ: Այնուհետեւ նրանք մեկնել են Շուշի, որտեղ ծաղկեպսակներ են դրել տանկ-հուշարձանի պատվանդանին, զորավար Վազգեն Սարգսյանի հուշարձանին, որից հետո այցելել են Սբ. Ղազանչեցոց եկեղեցի: Ի դեպ, այսօր Շուշիում տեղի կունենա նաեւ ԼՂՀ պաշտպանության բանակի սպայական կազմի համար կառուցված շենքի բնակարանամուտի հանդիսավոր արարողությունը: Երեկոյան Ստեփանակերտի կայազորի Սպայի տան դահլիճում տեղի կունենա հանդիսավոր երեկո, որից հետո կկազմակերպվի ԼՂՀ նախագահի ընդունելությունը: Երեկոյան նախատեսված է նաեւ Վերածննդի հրապարակում կազմակերպել տոնական համերգ, որը կուղեկցվի հրավառությամբ: