Ապրիլի 17-ին Օձունի եկեղեցին անսովոր մարդաշատ էր: Կիրակնօրյա պատարագից հետո Գուգարաց թեմի առաջնորդ, եպիկոպոս Տեր Սեպուհ Չուլջյանի մասնակցությամբ եկեղեցում կատարվեց զանգերի օծման արարողություն, և նշվեց մի քանի հոգևոր տոն` և Հիսուս Քրիստոսի հաղթական մուտքը Երուսաղեմ, և ճյուղերի օրհնությունը, և երեխաների օրհնությունը:

Օձունի բազիլիկ գմբեթավոր եկեղեցին զանգերից զրկվել է 1941-1945թթ. Հայրենական մեծ պատերազմի տարիներին: Ըստ տարածված կարծիքի` եկեղեցու զանգերը օգտագործվել են «Սասունցի Դավիթ» և «Մարշալ Բաղրամյան» տանկային շարասյուների ստեղծման համար: Զանգերի վերականգնումը վերջին տարիներին եղել է Օձունի եկեղեցու քահանա Տեր Վրթանես Բաղալյանի մտահոգություններից մեկը:

Երբ այս տարի «Վալլեքս» խմբի ընկերությունների մեջ մտնող «Թեղուտ» ՓԲԸ-ի գործադիր վարչության անդամ Ռուբեն Պապոյանն ընտրվեց Օձունի եկեղեցու խաչքավոր, զանգերի վերականգնման խնդիրը դարձավ հնարավոր: Ռուբեն Պապոյանի միջնորդությամբ «Վալլեքս» խմբի ընկերությունների գլխավոր տնօրեն Վալերի Մեջլումյանը եկեղեցուն նվիրել է 2 զանգ, որի ղողանջներն այսուհետև կտարածվեն Օձունում և հարևան 8 գյուղում:

Տեր Վրթանես քահանա Բաղալյանը «Հետքին» ասաց, որ եկեղեցու զանգերը կտեղադրվեն առաջիկա շաբաթվա ընթացքում: Նա հերքեց շրջանառվող այն լուրերը, թե եկեղեցու զանգակատան վթարային վիճակի պատճառով առաջիկայում հնարավոր չէ զանգեր տեղադրել: «Մենք փորձեցինք զանգակատները և տեսանք, որ կարող են մոտ 300 կգ ծանրություն պահել, և դա հիմք ընդունելով` այս զանգերը կկախենք»,- ասաց Տեր Վրթանեսը:

Զանգերից մեկը 150 կգ է, մյուսը` մոտ 90 կգ: Զանգակատները, սակայն, այս զանգերը կկրեն մի որոշ ժամանակ, իսկ հետագայում` զանգակատների քանդման և վերաշարման աշխատանքները կատարելիս, զանգերը կիջեցվեն և նորից կտեղադրվեն:

Տեր Վրթանեսն իր ուրախությունը հայտնեց նրա առթիվ, որ երկար լռությունից հետո Օձունի եկեղեցին զանգեր ունի, և այս զանգերը Աստծու ուշադրությունը կսևեռեն Օձունի և նրա շրջակա գյուղերի վրա, գյուղացիներին էլ կհրավիրեն դեպի եկեղեցի:

Օծման արարողությունից հետո Գուգարաց թեմի առաջնորդը շնորհակալություն հայտնեց Օձունի եկեղեցու խաչքավոր Ռուբեն Պապոյանին, ով ընդառաջել էր Տեր հոր խնդրանքին և Վալերի Մեջլումյանի միջոցներով կազմակերպել զանգերի նվիրատվությունը: «Այսօր բոլորդ ուխտավորներ եք, և աստված ընդունելի անի ձեր բոլորի ուխտը, սիրելի հավատացյալ ժողովուրդ: Ընդունելի անի բոլոր այն ուխտավորների նվերները, ովքեր այսօր չեն զլացել և իրենց հավատքի զորությամբ պատկերներ ու զանգեր են նվիրում այս սրբազան եկեղեցուն»,- ասաց Գուգարաց թեմի առաջնորդը:

Այնուհետև հավատացիալներին բաժանվեցին օրհնված ուռենու ճյուղեր: Օձունի եկեղեցու մանկական երգչախումբը հոգևոր երգեր կատարեց հավատացյալների համար: Տոների առթիվ հավատացյալներին և բարեգործին «Լոռի» հայրենակցական միության անունից շնորհակալություն հայտնեց միության նախագահ Սերգո Երցյանը:

Ապա ուխտավորները, չնայած հորդառատ անձրևին, շարժվեցին դեպի Արդվի գյուղ` մոմավառությամբ իրենց հարգանքի տուրքը մատուցելու Արդվի եկեղեցում թաղված Հովհան Իմաստասերին: