Այսօր Պաշտպանության նախարարության եւ Գլխավոր շտաբի ղեկավար կազմը, հասարակական կազմակերպությունների և Շենգավիթ համայնքի ներկայացուցիչների հետ, այցելել է «Եռաբլուր» պանթեոն և ծաղիկներ դրել հանուն հայրենիքի պաշտպանության համար նահատակված «Շենգավիթ -1» գրոհային ջոկատի 14 մարտիկների շիրիմներին: Վերջիններս հերոսաբար զոհվել են 1994թ. ապրիլի 21-ին: Երկարատև ջանքերի շնորհիվ շաբաթներ անց նրանց աճյունները տեղափոխվել են Հայաստան. նրանք կողք կողքի ամփոփված են «Եռաբլուրի» բարձունքում: ՊՆ մամլո ծառայության փոխանցմամբ` բարձրաստիճան զինվորականներն այսօր ծաղկեպսակներ ու ծաղիկներ են դրել նաեւ զոհված ազատամարտիների հիշատակը հավերժացնող հուշակոթողի մոտ, որը գտնվում է Շենգավիթ համայնքում: