Հոկտեմբերի 3-6-ը Երեւանում կանցկացվի նոր կինոփառատոն:  ReAnimania կոչվող փառատոնը պատրաստվում է իր շուրջը համախմբել հայ եւ օտարազգի անիմատորներին: Այսօր լրագրողների հետ հանդիպման ժամանակ փառատոնի հիմնադիր տնօրեն Վրեժ Քասունին նշեց, որ անիմացիոն փառատոնի հիմնական նպատակը Հայաստանում անիմացիոն կինոասպարեզն առաջ տանելն ու զարգացնելն է: Փառատոնը զուտ ֆիլմերի ցուցադրությամբ չի սահմանափակվելու: «Այս կինոփառատոնը անիմացիոն կինոյի համար նոր խթան կլինի: Առաջին հերթին մենք կարեւորում ենք միջազգային մի քանի ֆեստիվալների հետ համագործակցությունը»,-ասաց Վրեժ Քասունին: Փառատոնի օրերին միջազգային տարբեր անիմատորներ կանցկացնեն  վարպետության դասընթացներ: Փառատոնի Պատվո խորհրդում ընդգրկված են հայտնի անիմատոր Ռոբերտ Սահակյանցը, «Ոսկե Ծիրան»-ի նախագահ Հարություն Խաչատրյանը, Ազգային կինոկենտրոնի  տնօրեն Գեւորգ Գեւորգյանը եւ Ֆրանսիայի Պատկերապատման փառատոնի հիմանդիր Ժան Մարդիկյանը: ReAnimania- ն համագործակցում է Անսի Միջազգային անիմացիոն փառատոնի հետ: «Այս համագործակցությունը երկարատեւ է լինելու: Եվ մեզ տրամադրվելու է վերջին տարիների լավագույն միջազգային ֆիլմերը, ինչն իրոք մեծ անունների հետ է կապված»,- ասաց Վրեժ Քասունին: Փառատոնի ծրագրերի պատասխանատու Արծվի Բախչինյանն  ասաց, որ ինչպես ցանկացած մեծ փառատոն, ReAnimania-ն նույնպես ունի բազմազան ծրագիր: «Լինելու է մրցութային, արտամրցութային պրեմիերաներ,մանկական, հետահայաց ցուցադրումներ, ինչպես նաեւ ուսանողական դիպլոմային աշխատանքների ցուցադրություններ»,- ասաց Ա. Բախչինյանը: Փառատոնին մասնակցելու դիմումները ընդունվում են մինչեւ օգոստոսի 10-ը: Դիմումները կարելի է լրացնել փառատոնի կայքում` www.reanimania.com: Վրեժ Քասունին տեղեկացրեց, որ արդեն ներկայացվել են 15 դիմում արտասահմանից եւ 3 դիմում Հայաստանից: «Փառատոնին կմասնակցեն հայ այնպիսի անիմատորներ, ով այստեղ հայտնի չէ, սակայն հայտնի է արտերկրում: Այս տարի փառատոնը տոնակատարության կնմանվի: Երեւանում ինչքան շատ տոն լինի, այդքան լավ»,-ասաց Վրեժ Քասունին: