![zorro-bagaran_21.08.09 zorro-bagaran_21.08.09](https://hetq.am/wp-content/uploads/2009/08/zorro-bagaran_21.08.09.jpg)
Արդեն 2 տարի է` Արմավիրի մարզի Բագարան գյուղի բնակիչները գյուղ մտնող անծանոթներին զգուշացնում են` մութն ընկնելուն պես տանից դուրս չգալ: Պատճառը, ըստ բագարանցիների, գիշերը գյուղով շրջող դիմակավորված մարդն է, որն անհանգստացնում է գյուղացիներին: Մի քանիսը նույնիսկ տեսել են, թե ինչպիսին է իրենց ահ ու սարսափի մեջ պահող դիմակավորված անձը:
Երեւանաբնակ Անին իր հանգիստն անցկացրել է Բագարան գյուղում` տատիկի տանը: Նրա ասելով` 4 օրվա մեջ վախից մի քանի կիլոգրամ նիհարել է. «Ամեն քայլափոխի այդ դիմակավորված մարդու մասին էին խոսում: Ես չեմ տեսել, բայց հարազատներիս ասելով` նա բարձրահասակ է ու ամբողջովին սեւ հագուստ է կրում: Ասում են` Զորոյի դիմակից է դնում ու, մութն ընկնելուն պես, մոտենում է մարդկանց պատուհաններին ու սկսում է թակել, բայց որ տանից դուրս են գալիս` փախչում է»:
Բագարանցիների խոսքերով` նորահայտ «Զորոն» անհանգստացնում է հատկապես այն ընտանիքներին, որտեղ երիտասարդ աղջիկ կա:
Բագարանի համայնքապետ Գեւորգ Մարգարյանն էլ համագյուղացիներից է լսել դիմակավորված մարդու մասին, սակայն նրան իր աչքով չի տեսել: Գյուղապետն անցյալ տարի նույնիսկ ոստիկանություն էր դիմել` անկոչ հյուրի ով լինելը պարզելու համար:
«Գյուղացիների ասածը չափազանցված է, քանի որ վախեցել են: Իմ կարծիքով` դիմակավորված անձը սիրահարված մի տղա է: Քանի որ նա գիշերով է հայտնվում, այդ իսկ պատճառով ամբողջությամբ սեւ հագուստ է կրում, որ իրեն չճանաչեն»,- ասաց Գեւորգ Մարգարյանը:
Համայնքապետի փոխանցմամբ` իր կասկածները ճիշտ են, քանի որ նախորդ տարի, երբ գյուղացիների խնդրանքով դիմել էր իրավապահ մարմինների օգնությանը, ոստիկանները հայտնաբերել էին սիրահարված մի տղայի, որը գիշերով սիրած աղջկա պատուհանի տակ էր հայտնվել:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել