Սեպտեմբերի 27-ին Ղարաբաղում առաջին անգամ տեղական հանրաքվե կանցկացվի. Քաշաթաղի շրջանի վարչակազմի առաջարկությամբ ԼՂՀ կառավարությունը օգոստոսի 10-ին որոշում է ընդունել` հանրաքվե անցկացնել շրջանի Տանձուտ եւ Ծիծեռնավանք համայնքները միավորելու առաջարկությամբ: Հանրաքվեի անցկացման հետ կապված հարցերն են օրերս քննարկել ԼՂՀ կետրոնական ընտրական հանձնաժողովի նիստում: Ինչպես գրում է «Ազատ Արցախ»-ը, մի քանի ամիս առաջ Տանձուտ համայնքում համայնքապետի հերթական ընտրությունն էր անց կացվում, սակայն առաջադրում չլինելու պատճառով այն համարվեց չկայացած: Այս եւ այլ հանգամանքներից ելնելով էլ շրջանի ղեկավարությունը դիմել է կառավարությանը` վերոնշյալ համայնքները միավորելու հարցով: Օրենքի համաձայն` հանրաքվեն կայացած կհամարվի, եթե կողմ քվեարկի մասնակիցների կեսից ավելին, որը պակաս չպետք է լինի ցուցակներում ընդգրկվածների 1/3-ից: