ԼՂՀ ազգային վիճակագրական ծառայության ուսումնասիրութունները պարզել են, որ Ղարաբաղում, չնայած բավարար քանակով ցորեն է արտադրվում, շարունակում են օգտագործել ոչ թե սեփական արտադրության ալյուրը, այլ Հայաստանից ներկրածը: Այսօր Ղարաբաղի խանութներում հիմնականում վաճառվում են Հայաստանում արտադրվող ալյուրը, որի 1 կգ-ն արժե 180 դրամ: Պատճառներից մեկն այն է, որ Ղարաբաղում արտադրվող ցորենից հիմնականում բարձրակարգ ալյուր չի ստացվում, ինչն էլ պատճառ է հանդիսանում գնել ներկրված ալյուրը: Գյուղաբնակների մի մասը հաց թխելու համար սովորաբար սեփական արտադրության ալյուրի հետ խառնում է ներկրված բարձրակարգ ալյուրը: Վիճակագրական ծառայություն Ղարաբաղում հացի սպառման եւ արտադրության ծավալները ճշտելու նպատակով այս տարվա հունիս-հուլիս ամիսներին անցկացրել  է բնակչության կողմից հացի (հացաբուլկեղենի) սպառման ընտրանքային հետազոտություն, որի արդյունքները ծառայությունը հրապարակել է օրերս: Հետազոտությունն անց է կացվել մայրաքաղաքում եւ յոթ շրջանների 17 համայնքներում, այդ թվում` 4 քաղաքային եւ 14 գյուղական: Հարցումներն իրականացվել են տարբեր քանակի անդամներ ունեցող 2641 տնային տնտեսություններում, որոնցից 1557-ը քաղաքաբնակ եւ 1084 գյուղաբնակ: Հետազոտությունների արդյունքում պարզվել է, որ 2641 տնային տնտեսությունների կողմից մեկ ամսվա ընթացքում սպառվել է 115.0 հազ. կգ հաց, որի 49.7 տոկոսը գնված , 50.3 տոկոսը տնային տնտեսություններում թխված: Պարզվում է, որ տնային տնտեսությունում արտադրված հացի համար օգտագործված ալյուրի մեծամասնությունը` 79,1տոկոսը, գնվել է, իսկ 20,9 տոկոսը սեփական արտադրանք է: Ստեփանակերտ քաղաքում, Շահումյանի եւ Քաշաթաղի շրջանների տնտեսությունները հաց արտադրել են բացառապես գնված ալյուրով: Զարմանալի է, որ գյուղական բնակավայրերի տնային տնտեսությունների կողմից արտադրված հացի հումքը` ալյուրը, հիմնականում գնվել է. հացի 69.5 տոկոսը գյուղական բնակավայրերի տնային տնտեսություններում արտադրվել է գնված ալյուրով, ընդ որում Շահումյանի եւ Քաշաթաղի շրջանում այն կազմել է 100 տոկոս, Շուշիի շրջանում 97.4 տոկոս, Մարտակերտի շրջանում 94.1 տոկոս: Գնման միջոցով հացի սպառման ամենաբարձր կշիռն արձանագրվել է Ստեփանակերտ քաղաքում` 93.8 տոկոս, ամենացածրը` Շահումյանի շրջանում` 0.9 տոկոս: Հարցումները խոսում են նաեւ այն մասին, որ մեկ տնային տնտեսությունը միջին հաշվով ամսական սպառում է 43.5 կգ հաց, ընդ որում քաղաքաբնակ տնային տնտեսություններում ցուցանիշը 39 կգ է, գյուղաբնակ տնային տնտեսությունում 50 կգ կամ 28.2 տոկոսով ավել: Իսկ հացի միջին օրական սպառումը մեկ բնակչի հաշվով կազմել է 390,2 գրամ, իսկ մինչեւ 8 տարեկան երեխա ունեցող տնային տնտեսություններում` 365,5 գրամ կամ 93,7 տոկոսը: Այսպիսով` ըստ իրականացված գնահատման , հանրապետությունում բնակչության կողմից տարվա կտրվածքով միջին հաշվով սպառվում է 18742,7 տոննա հաց, որից 8439 տոննան կամ 45 տոկոսը գնման միջոցով է ապահովվում: Տարվա կտրվածքով տնային տնտեսություններում սեփական սպառման նպատակով օգտագործվում է 10303,7 տոննա հացի հաշվարկով ալյուր, որից 6067,1 տոննան գնվում է: