Մենք սեպտեմբերից կշարունակենք կլոր սեղանները ինչպես քաղաքական, այնպես էլ այլ թեմաներով, կկազմակերպենք առանձին խնդիրներին եւ ոլորտներին նվիրված քննարկումներ, օնլայն ռեժիմով հարցազրույցներ պաշտոնյաների, քաղաքական գործիչների, տարբեր ոլորտների մասնագետների հետ:
Եւ քանի որ հոդվածների տակ թողնված մեկնաբանությունների դաշտում ծավալվող քննարկումները հաճախ առնչություն չեն ունենում հոդվածի հետ, «Հետքը» որոշել է ընթերցողների համար ստեղծել մի տարածք՝ քննարկելու օրվա կամ շաբաթվա կարեւոր իրադարձությունը: Թեմաները կառաջարկենք մենք, բայց ընթերցողները նույնպես կարող են հանդես գալ նախաձեռնություններով:
Պարզապես ուզում ենք խնդրել մեր ընթերցողներին խուսափել մեղադրանքներից, վիրավորանքներից եւ հայհոյանքներից:

Այս շաբաթ առաջարկում ենք քննարկել  ռուս-վրացական պատերազմը: Ի՞նչ հետեւանքներ այն կարող է ունենալ  Հայաստանի համար: Արդեն հայտնի է, որ  30 տոկոսով կրճատվել են Վրաստանի տարածքով Հայաստան մատակարարվող գազի ծավալը, դադարեցվել են բեռնափոխադրումները:  Եւ դժվար է ասել, թե որո՞նք են լինելու Ռուսաստանի եւ Վրաստանի հաջորդ քայլերը: Եթե նույնիսկ պատերազմը դադարի, ապա ստեղծված վիճակը իր հետ բերելու է նոր խնդիրներ:  Եթե հաշվի առնենք, որ հակամարտող կողմերը մեզ համար ռազմավարական նշանակություն ունեցող երկրներ են, ապա կարող ենք արձանագրել, որ  Հայաստանը հիվանդագին «չեզոքություն» է ցուցաբերել պատերազմին: Մինչդեռ Հայաստանը հենց առաջինը կարող էր միջնորդական խաղաղարար առաքելությամբ հանդես գալ: Ինչու՞ է Հայաստանը նման դիրքորոշում որդեգրել: Փորձենք քննարկել այս խնդիրները:

Նորից ենք խնդրում մեկնաբանությունները գրել հայերեն, լատինատառ գրությունները, հայհոյանքներ, վիրավորանքներ պարունակող արտահայտությունները անխտիր հանվելու են: