«Հասարակական կազմակերպությունների մասին» ՀՀ օրենքում փոփոխություններ ու լրացումներ կատարելու մասին» ՀՀ օրենքի նախագիծն ուղղակի կախվածության մեջ է գցում հասարակական կազմակերպություններին Արդարադատության նախարարությունից: Ավելի քան ութսուն հասարակական կազմակերպություններ իրենց բողոքի ձայնն են բարձրացրել ընդդեմ այս օրինագծի, որով Կառավարությունը, ի դեմս Արդարադատության նախարարության, փորձ է անում սահմանափակել ժողովրդավարական հասարակության հիմնարար սկզբունքներից մեկը` միավորումներ կազմելու իրավունքը: Անընդունելի են վերոհիշյալ օրինագծի մշակման, ներկայացման և Կառավարության նիստում հաստատման ոչ թափանցիկ ու անհասկանալի գործընթացները, ինչով, ըստ էության, արհամարhվել է ժողովրդավարության հիմնական հենասյուններից մեկը` քաղաքացիական հասարակության ինստիտուտը: Նախագծում առաջարկվող փոփոխությունների ու լրացումների զգալի մասը հանդիսանում են էական սպառնալիք Հայաստանում քաղաքացիական հասարակության կայացման գործընթացում: Առաջարկվող փոփոխությունները չեն համապատասխանում հասարակական կազմակերպությունների իրավական կարգավիճակի կանոնակարգման ոլորտում առկա միջազգային փաստաթղթերի ոգուն, մասնավորապես` Եվրոպայի նախարարների կոմիտեի անդամ երկրներին ուղղված Rec (2007) 14 հանձնարարականի դրույթներին:

• «Հասարակական կազմակերպությունների մասի» օրենքում փոփոխությունների մտցնելու» պարագայում ի՞նչ հիմքով են մտցվել նշված դրույթները և փոխարենը անտեսվել տարբեր ՀԿ-ների կողմից արդեն տարիներ շարունակ քարոզվող այն փոփոխությունները, որոնք առավել բարենպաստ միջավայր կստեղծեին քաղաքացիական հասարակության կայացման համար:

• «Անկեղծ, արդարացի և խոստումնալից» պետական այս նախաձեռնության մեջ ինչպիսի՞ վտանգներ ու խոչնդոտներ են տեսնում հայաստանյան հասարակական կազմակերպությունները:

• Եթե ուժի մեջ մտած լիներ այս վիճահարույց օրինագիծը, քանի՞ հասարակական կազմակերպություն կլիներ այժմ Հայաստանում, կամ դրանցից քանի՞սը կլիներ անկախ պետական միջամտությունից:

• Ի վերջո, ինչո՞ւ են ՀԿ-ները դեմ այս օրինագծին:

Այս հարցերի շուրջ ՀԿ-ները իրենց մտահոգություններն են ուզում լսելի դարձնել հանրությանը: Այդ նպատակով Քաղաքացիական հասարակության կառույցների նախաձեռնող խումբը  վաղը հրավիրում է զանգվածային լրատվմիջոցներին մասնակցելու Երևանի Փաստարկ ակումբում կայանալիք մամլո ասուլիսին: Քաղաքացիական հասարակության կառույցների նախաձեռնող խումբ, 79 հասարակական կազմակերպություններ