Արագածոտնի մարզի Ուշի գյուղի կենտրոնում գտնվող երկհարկանի շինության արտաքին տեսքը հուշում է, որ այն բնակելի շինություն չէ` թեեւ շենքի պատին այդ մասին հուշող ոչ մի ցուցանակ փակցված չէ: Շենքը ծառայում է ե’ւ որպես գյուղապետարան, ե’ւ մշակույթի տուն, ե’ւ գրադարան, ինչպես նաեւ տեղակայված է «Փոստը»: Ճիշտ է, «բազմաբովանդակ» շենքը նաեւ մշակույթի տան համար առանձին մասնաբաժին ունի, սակայն դահլիճն այնպիսի ավերակ վիճակում է, որ նույնիսկ այդ տարածքում գտնվելն է վտանգավոր մարդկանց կյանքի համար: Քանի որ տանիքն ամբողջությամբ վնասված է, անձրեւաջրերը հոսում են ներս: Առաստաղն արդեն քայքայված է եւ վերեւից քարեր են պոկվում ու թափվում բեմին: «Քանի որ դահլիճ չունենք, գյուղում չենք կարողանում ոչ մի միջոցառում կազմակերպել: Մի քանի անգամ եկել չափագրումներ են արել, որ վերանորոգման աշխատանքներ իրականացվի, սակայն, ամեն անգամ վերանորոգման խոստումներն իրականություն չի դառնում»,-«Հետքի» հետ զրույցում ասաց Ուշիի գյուղապետարանի աշխատակազմի քարտուղար Աստղիկ Հովհաննիսյանը: Գյուղում միակ նորակառույցը  ամբուլատորիայի շենքն է, որը նախկինում նույնպես գտնվել է կենտրոնացված շենքում: «Գյուղի բյուջեն այնքան աղքատիկ է, որ հնարավորություն չունենք մեր միջոցներով վերանորոգման աշխատանքներ իրականացնել»,-ավելացրեց աշխատակազմի քարտուղարը: Մինչ Ուշիում կվերանորոգվի կամ ընդհանրապես չի վերանորոգվի մշակույթի տունը` գյուղի տղամարդիկ շարունակում են ամառ-ձմեռ իրենց նարդին ու բլոտը խաղալ բաց երկնքի տակ: