Հայաստանում կա 21.500 բազմաբնակարան շենք, որոնց մեծ մասն ունի 60 տարվա վաղեմություն: Պարզվում է՝ մեր երկրում յուրաքանչյուր 3-րդ բազմաբնակարան շենքը վթարային է կամ գտնվում է վատ վիճակում: 

11.000 բնակարաններով 420 բազմաբնարանային շենք ունեն 3-րդ աստիճանի վթարայնություն, իսկ 26 շենք՝ 971 բնակարանով, խիստ վտանգավոր է այնտեղ ապրող մարդկանց կյանքի եւ առողջության համար: Դրանք ունեն 4-րդ եւ 5-րդ աստիճանի վթարայնություն եւ առաջնահերթ վերանորոգման կարիք ունեն: 

Բացի բազմաբնակարան շենքերից, հանրապետությունում կա նաեւ 996 բնակելի տներ, որոնք տեխնածին, բնական աղետների, ինչպես նաեւ թշնամու կողմից ռմբակոծության արդյունքում ստացել են 4-րդ եւ 5-րդ կարգի վթարայնություն, որոնց վերանորոգման համար անհրաժեշտ է մոտ 6 մլրդ դրամ:

ԱԺ պատգամավոր Վիկտոր Դալլաքյանը կառավարության անդամների հետ հարց ու պատասխանի ժամանակ հայտարարեց, որ պետությունը պետք է հոգա այնտեղ ապրողների կյանքի եւ առողջության համար, քանի որ վերջիններս ի վիճակի չեն ինքնուրույն լուծել ծառացած խնդիրները: Ըստ պատգամավորի՝ մտահոգիչ է վիճակը հատկապես աղետի գոտում: Օրինակ՝ պատգամավորի ծննդավայր Վանաձոր քաղաքում կա 3-րդ աստիճանի վթարայնության 84 բազմաբնակարանային շենք:

«Ակնհայտ է, որ սոցիալական ծանր վիճակում գտնվող եւ օրվա հացի գումար չունեցող բնակչությամբ ֆինանսական աղքատիկ միջոցներ ունեցող համայնքներն ի վիճակի չեն լուծելու բազմաբնակարան շենքերի ամրացման, հիմնանորոգման, տանիքների վերանորոգման, վերելակների անխափան աշխատանքների եւ բազմաբնակարան շենքերի պահպանման խնդիրները: Անվիճելի է՝ այդ հարցում անհրաժեշտ է պետական լուրջ աջակցություն»,- ասաց Վ. Դալլաքյանը: 

Քաղաքաշինության նախարար Վարդան Վարդանյանն էլ հայտարարեց, թե նախարարությունն ուսումնասիրել է վիճակը եւ արդյունքում մշակվել է բազմաբնակարան շենքերի պահպանման հայեցակարգ, որը գտնվում է քննարկման փուլում եւ առաջիկայում կներկայացվի պատգամավորների եւ շահագրգիռ այլ անձանց դատին: 

Ըստ նախարարի՝ հանրապետությունում միայն 3-րդ աստիճանի վթարային շենքերի ամրացման համար անհրաժեշտ է 110 մլրդ դրամ: 

«Բնականաբար, այսօր մենք այդ հնարավորությունները չունենք, որ մոտակա տարիներին միանգամից լուծենք այդ հարցը: Հայեցակարգով նշվելու է ժամկետ, որ ըստ տարիների պետություն-մասնավոր համագործակցության արդյունքում փորձենք այդ խնդիրը լուծել»,- ավելացրեց նախարար Վարդանյանը:

Հետո նախարարն ասաց, թե պետք չէ մոռանալ, որ վերջին 2 տարիների ընթացքում աղետի գոտու բնակշինարարության համար միայն պետական բյուջեից հատկացվել է 75 մլդր դրամ: 

«Սա այն հարցն է, որտեղ չի կարելի ժլատություն կամ որոշակի զսպվածություն ցուցաբերել: Պետությունը պետք է առավելագույնս ջանքեր գործադրի»,- հավելեց Վիկտոր Դալլաքյանը: