Այսօր տեղի է ունեցել կառավարության նիստ, որը վարել է ՀՀ վարչապետ Տիգրան Սարգսյանը, գործադիրի հավանությունն է ստացել «Հեռուստատեսության եւ ռադիոյի մասին» ՀՀ օրենքում փոփոխություններ եւ լրացումներ կատարելու մասին» ՀՀ օրենքի նախագիծը: Այնտեղ ներառված են կառավարության հավանությանն արժանացած ռադիոհեռուստատեսային հեռարձակման թվային համակարգին անցման հայեցակարգից բխող մի շարք նոր հասկացություններ եւ դրույթներ։ Վարչապետ Տիգրան Սարգսյանը կարեւորել է օրինագծի` միջազգային պատշաճ փորձաքննություն անցնելու փաստը: Ավելին, փորձագետները տրամաբանական եւ խիստ անհրաժեշտ են համարել ոլորտում իրականացվող բարեփոխումը։ Միեւնույն ժամանակ վարչապետը նշել է, որ հեռուստատեսության եւ ռադիոյի բնագավառը խիստ նուրբ է եւ հաճախ է քաղաքական շահարկման առարկա դառնում։ Նա հավաստել է, որ նոր օրինագիծը հնարավորություն է տալիս մեր երկրում զարգացնել քաղաքական, մշակութային, կրթական, մանկական հեռուստահաղորդումները, բավարարել բնակչության բոլոր խավերի պահանջարկը, ապահովել առողջ մրցակցություն, բայց եւ կուլ չգնալ շուկայական տնտեսության թելադրանքին։