Այսօր ՀՀ կրթության եւ գիտության նախարարը, խոսելով Նուբարաշենի 11 հատուկ դպրոցի նախկին ուսուցիչ Լեւոն Ավագյանի գործով դատական հանգուցալուծման մասին, ասաց, որ ուրախ է, որ արդարությունը ի վերջո հաղթեց: Լրագրողների այն դիտարկմանը, թե այնուամենայնիվ, դպրոցում տիրող իրավիճակի ողջ իրականությունը բացահայտելուց հետո էլ պատիժ է կրելու միայն Լեւոն Ավագյանը, իսկ երկար տարիներ երեխաների նկատմամբ ուժ եւ բռնություն կիրառած տնօրեն Մերուժան Ենգիբարյանը շարունակում է ղեկավարել դպրոցը, Աշոտյանը պատասխանեց, որ այսօր հատուկ դպրոցներում նախարարությունը կադրային խնդիր ունի եւ չի ուզում կենտրոնանալ միայն 11 դպրոցի վրա: «Ես խոստանում եմ, որ մոտ ապագայում դուք ականատես կլինեք հատուկ դպրոցներում կադրային փոփոխություններին: Իհարկե այդ փոփոխությունները կարվեն օրենքի սահմաններում: Հենց այնպես մարդուն հանել աշխատանքից, խոստովանենք, որ ճիշտ չէ»,-Աշոտյանի այս դիտարկմանը լրագրողները հակադարձեցին, որ խոսքը «հենց այնպես»-ի մասին չէ, այլ` ապացուցված փաստերի: «Ես ձեզ խոստանում եմ,  որ հատուկ դպրոցների համակարգում մեծ փոփոխություններ կարվեն: Իսկ այդ փաստերին ես ինքս կծանոթանամ, եւ եթե պարզվի դրանց իսկությունը, ես խոստանում եմ, որ Նուբարաշենի 11 դպրոցի տնօրենի պաշտոնավարման հարցը կլուծվի»: