Հայաստանի ազգային կինոկենտրոնի նախաձեռնած «Կինոաշուն»  ազգային կինոյի ամիս ծրագիրը կմեկնարկի «Մոսկվա» կինոթատրոնում հոկտեմբերի 11-ին: Մինչեւ նոյեմբերի 10-ը ներարառյալ այստեղ  երեւանցիները  կդիտեն հայկական կինոյի  արժանահիշատակ ֆիլմերի  պրեմիերաներ, կնշվեն մի շարք հոբելյաններ: Միաժամանակ, մեկամսյա կինոցուցադրություններ կիրականացվեն մայրաքաղաքի այլ վայրերում, այդ թվում`  Հայաստանի ազգային պատկերասրահի, «Նարեկացի» արվեստի կենտրոնի, Տիկնիկային թատրոնի եւ Երեւանի թատրոնի եւ կինոյի եւ մանկավարժական ինստիտուտների դահլիճներում: Մայրաքաղաքի կինոսիրող հանրությունը նաև հնարավորություն կունենա  երկու բացօթյա «կինոթատրոններում»`Կասկադում եւ  Սիրահարների այգում, չորս շաբաթ շարունակ, յուրաքանչյուր ուրբաթ, շաբաթ եւ կիրակի օրերին դիտել իրենց համար հարազատ եւ սիրելի դարձած ֆիլմերը, այդ թվում`  «Կարինե»,  «Հարսնացուն Հյուսիսից»,   «Առաջին սիրո երգը»,  «Նամուս»,  «Շորն ու Շորշորը» համր «Պեպո», «Շիրակի մեղեդիները», մանկական ֆիլմերի ծրագիր եւ այլն: Բուհերում կցուցադրվեն  անկախությունից հետո արտադրված  ժամանակակից ֆիլմեր, որոնց համար ուսանողների շրջանում հայտարարվելու է  լավագույն գրախոսականների մրցանակաբաշխություն:  Մրցութային հանձնաժողովի անդամներն են`  Դավիթ Մուրադյանը, Սուրեն Հասմիկյանը, Նունե Հախվերդյանը, Անիտա Երզնկյանը եւ այլք: Ծրագրի աշխատակազմի որոշմամբ, մարզային կինոծրագրերում եւս ընտրված են ժամանակակից հայ ռեժիսորների գործերը: Այս տարի կինոցուցադրությունների համար  ընտրվել են միայն չորս` Շիրակի, Կոտայքի,  Արագածոտնի  եւ Արմավիրի մարզերը, քանի որ  ծրագիրը ընդունվել է օգոստոսի 20-ից հետո: Հայաստանի ազգային կինոկենտրոնի մամուլի ծառայությունից խոստանում են, որ հաջորդ տարի կընդգրկվեն բոլոր մարզերը: «Կինոաշուն» ծրագրի շրջանակներում «Մոսկվա» կինոթատրոնի ճեմասրահում կբացվի նաեւ ֆոտոցուցահանդես: «Կինոաշուն» ծրագրի առաջնային նպատակն է  ամեն տարի մեկ ամիս մայրաքաղաքում եւ մարզերում իրականացնել  ինչպես ազգային կինոֆոնդում պահպանվող ֆիլմերի  ցուցադրությունն ու տարածումը, այնպես էլ ժամանակակից  հայ կինոարտադրանքի մասսայական տարածումը և հայ ժամանակակից կինոյի մասին հասարակական կարծիքի ձևավորումը, արդի հայ կինոն հայ հանրության մշակութային կյանքի անքակտելի բաղկացուցիչ դարձնելը: Հոկտեմբերը այսուհետ նախատեսվում է հայտարարել ազգային կինոյի ամիս և ամեն տարի նույն ամսին անցկացնել ազգային կինոյի բազմաժանր ցուցադրություններ մայրաքաղաքում  եւ մարզերում: Ի դեպ, այս տարվա հոկտեմբեր ամսին Երեւանում տեղի կունենա նաեւ իտալական ժամանակակից կինոյի փառատոն: