ՀՀ բնապահպանության նախարար Արամ Հարությունյանի հրավերով Հայաստան է ժամանել Գլոբալ էկոլոգիական հիմնադրամի գործադիր տնօրեն տիկին Մոնիկ Բարբուտը: Գլոբալ էկոլոգիական հիմնադրամը /ԳԷՀ/  հիմնվել է  1991թ և նպաստում է Երկիր մոլորակի շրջակա միջավայրի  պահպանման գործընթացին` ֆինանսական միջոցները նպատակաուղղելով գլոբալ բնույթի բնապահպանական հիմնախնդիրների լուծմանը: Հայաստանի Հանրապետությունը ԳԷՀ-ի հետ համագործակցում է 1994 թվականից, այդ  անցած ժամանակահատվածում  Հայաստանում իրականացվել է հանրապետության համար  կարևոր նշանակություն ունեցող 17  ծրագիր` 21.9մլն դոլար արժողությամբ: Հայաստանում ԳԷՀ-ի քաղաքական և գործառնական համակարգող է  հանդիսանում ՀՀ բնապահպանության նախարար  պարոն Արամ Հարությունյանը: Հոկտեմբերի 19-ին, ՀՀ բնապահպանության նախարար  Արամ Հարությունյանը ընդունել է տիկին Մոնիկ Բարբուտին: Հանդիպման ընթացքում քննարկվել են ՀՀ-ում առկա բնապահպանական խնդիրները, ԳԷՀ-ի ներդրումային ծրագրերն ու դրանց արդյունքները, ամփոփվել է ԳԷՀ-ի հետ համագործակցության 4-րդ փուլը, որի   շրջանակներում 2005-2009թթ ժամանակահատվածում իրականացվել են  մի շարք ազգային և տարածաշրջանային բնապահպանական  ծրագրեր` 5.5 մլն դոլար արժողությամբ և նախագծվել են  ԳԷՀ 5-րդ փուլում համագործակցելու հեռանկարները: ԳԷՀ -5 գործընթացի շրջանակներում 2011-2015թթ-ն Հայաստանի Հանրապետության համար նախատեսված բյուջեն կազմում է 7.97մլն ԱՄՆ դոլար` ըստ կիզակետային ոլորտների: Նախարար Արամ Հարությունյանը կարևորեց այս հանդիպումը և հույս հայտնեց, որ այն կտա իր առավել դրական արդյունքները հետագա համագործակցության համար: ՀՀ բնապահպանության նախարարը և տիկին Բարբուտը հանդիպեցին ՀՀ–ում  ԳԷՀ-ի ֆինանսավորմամբ ծրագրեր իրականացնող միջազգային գործակալությունների հետ, այդ թվում` Համաշխարհային բանկի (WB), ՄԱԿ-ի Շրջակա միջավայրի ծրագրի (UNDP), Միավորված ազգերի արդյունաբերական  զարգացման կազմակերպության(UNIDO) և ՀՀ վարչապետի որոշմամբ ստեղծված  «ԳԷՀ-ի հետ համագործակցության հանձնաժողովի»  անդամների հետ: Հանդիպման ընթացքում պարոն Հարությունյանը ներկայացրեց տիկին  Բարբուտի այցի նպատակը,  ԳԷՀ-ի հետ համագործակցությունը, ինչպես նաև այն գործողությունները, որոնք նախատեսված  են իրականացնել  տիկին Բարբուտի այցի ընթացքում: Այնուհետև տիկին  Բարբուտը խոսեց իր այցի և հանձնաժողովի հետ քննարկվելիք հարցերի շուրջ, միաժամանակ կարևորելով ՀՀ վարչապետի կողմից «ԳԷՀ-ի հետ համագործակցության հանձնաժողովի»  ստեղծումը: Նա նշեց նաև, որ ԳԷՀ-ի ռազմավարական խնդիրներից է աջակցությունը երկրներին` որոշումներ կայացնլու, բնապահպանական խնդիրները ծրագրավորելու և ինքնուրույն ծրագրեր իրականացնելու պարագայում: Պլանավորված է այցելություն «Սևան» ԱՊ և «Խոսրով» պետական արգելոց, որտեղ կքննարկվեն նոր ներդրումային ծրագրեր և համագործակցության հեռանկարները: Հոկտեմբերի 20-ին, նախատեսվում է ՀՀ բնապահպանության նախարարի և տիկին Բարբուտի համատեղ մամլո ասուլիսը: Այս մասին տեղեկացնում է  ՀՀ բնապահպանության նախարարության մամուլի ծառայությունը: