Հանրապետությունում շարունակվում են արձանագրվել սննդային` թունավոր սնկերի օգտագործման հետևանքով առաջացած և մանրէային ծագման (բոտուլիզմի) թունավորման դեպքեր: Թունավորման նախնական ախտանիշներն են` սրտխառնոցը, փսխումը, գլխապտույտը, աղեստամոքսային տրակտի խանգարումները: Նախնական ախտանիշների ի հայտ գալուն պես անհրաժեշտ է շտապ դիմել բժշկի: Թունավոր սնկերի օգտագործման հետևանքով արձանագրվել է սննդային թունավորման 16 դեպք, որից տուժել է 31 մարդ` 4-ը, դժբախտաբար, մահվան ելքով: Թունավորումների առաջացման պատճառը հիվանդներ հավաքած սնկերի օգտագործումն է սննդում (Կոտայքի, Լոռու, Արարատի, Արմավիրի մարզեր և Երևան): 2010 թ. արձանագրվել է մանրէաբանական ծագման թունավորման` բոտուլիզմի 7 դեպք, որից տուժել է 11 մարդ` 1-ը, դժբախտաբար, մահվան ելքով: Թունավորումներն առաջացել են տնային պայմաններում պատրաստված կարմիր պղպեղի, ծիծակի, վարունգի մարինադի, սմբուկի խավիարի պահածոների օգտագործման հետևանքով (Կոտայքի, Տավուշի, Շիրակի մարզեր): Սննդային թունավորումից խուսափելու համար ՀՀ առողջապահության նախարարությունը խորհուրդ է տալիս. - Չհավաքել, չգնել ու սննդում չօգտագործել անհայտ ծագման, չստուգված սնկեր: - Սունկն անհրաժեշտ է գնել միայն շուկայից և խանութներից` համապատասխան իրավասու մարմնի տված փաստաթղթի առկայության դեպքում: - Չգնել շուկայում, փողոցներում վաճառվող և պատահական անձանց կողմից տնային պայմաններում պատրաստված պահածոյացված սննդամթերք: - Պահածոները պատրաստել ոչ հերմետիկ փակ տարողություններում: - Տնային պայմաններում պատրաստված պահածոները սննդում օգտագործելուց առաջ պարտադիր ենթարկել մանրակրկիտ ջերմային մշակման` 20-25 րոպե տևողությամբ, եռացնելու կամ տապակելու եղանակով: