![budget](https://hetq.am/wp-content/uploads/2010/10/budget.jpg)
Այսօրվանից Ազգային ժողովում քննարկվում է 2011 թ. պետական բյուջեի նախագիծը: Ֆինանսների նախարար Տիգրան Դավթյանը ներկայացրեց բյուջեի ծախսերի կարեւոր մասերը: Անդրադառնալով մի քանի ոլորտների` Տ. Դավթյանն ասաց, որ սոցիալական ապահովության ոլորտից 2011 թ. միայն 200 մլրդ դրամ նախատեսվել է կենսաթոշակների վճարման համար, ինչը 18 մլրդ դրամով ավել է այս տարվա հատկացումից:
Ավանդների փոխհատուցման համար գալիք տարվա բյուջեով նախատեսվել է այնքան գումար, ինչքան այս տարի` 1 մլրդ 650 մլն դրամ:
3,8 մլրդ դրամ նախատեսված է ճանապարհաշինության համար: «Սա սեփական եկամուտներից է հատկացված, բայց դրանով չենք սահմանափակվելու, եւ տարբեր վարկային միջոցներից նույնպես հատկացումներ արվելու են»,- ասաց Տ. Դավթյանը:
Շարունակվելու է նաեւ աղետի գոտում բնակարանաշինության ծրագիրը: Այդ նպատակով 2011-ին հատկացվելու է 26,5 մլրդ դրամ:
«2011 թ. բյուջեն լինելու է այս տարվա բյուջեի տրամաբանական շարունակությունը: Մեզ համար կարեւոր խնդիր է ֆինանսական, մակրոտնտեսական կայունությունը եւ սոցիալական զարգացման կայունության ապահովումը»,- ավելացրեց ֆինանսների նախարարը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել