Գյուղատնտեսության նախարարության Բուսասանիտարիայի պետական տեսչության նախկին պետ Վռամ Գյուլզադյանը «Հետքի» հետ զրույցում հաստատեց, որ իրեն աշխատանքից ազատել են ԱԺ պետաիրավական հարցերի մշտական հանձնաժողովի նախագահ, պատգամավոր Դավիթ Հարությունյանի դստեր պատճառով: «Իմ պաշտոնանկությունն, այո կապ ունի Դավիթ Հարությունյանի դստեր հետ»,-ասաց Վ. Գյուլզադյանը` խոստանալով առաջիկայում պարզաբանումներ տալ: Ըստ մամուլում շրջանառվող լուրերի` Դավիթ Հարությունյանի դուստրը զբաղվում է այնպիսի նյութերի ներկրման բիզնեսով, որոնք ստուգվում են Բուսասանիտարիայի պետական տեսչության կողմից: Գյուղատնտեսության նախարարության հասարակայնության հետ կապերի բաժնի պետ Վահագն Մարտիրոսյանից փորձեցինք ճշտել, թե պաշտոնանկությունը որքանով է կապված Դ. Հարությունյանի հետ: «Իսկ ինչո՞ւ չեք հարցնում Վռամ Գյուլզադյանից»,-ասաց Վահագն Մարտիրոսյանը: Երբ տեղեկացրինք, որ Վ. Գյուլզադյանը հաստատել է այդ փաստը, Վ. Մարտիրոսյանն ասաց, որ Բուսասանիտարիայի պետական տեսչության պետն աշխատանքից ազատվել է պաշտոնական բոլոր ընթացակարգերով եւ որեւէ տեղ չի նշվել, թե նրա պաշտոնանկությունը կապ ունի պատգամավորի դստեր հետ: «Նշվել է, որ նա աշխատանքից ազատվել է օրենքով սահմանված պարտականությունները չկատարելու համար, այլ ոչ պատգամավորի դստեր պատճառով»,-նշեց Վ. Մարտիրոսյանը: «Ժխտո՞ւմ եք, որ նման բան կարող է եղած լինել»,- մեր հարցին ի պատասխան Վահագն Մարտիրոսյանն ասաց. «Ես որեւէ բան չեմ ասում, այստեղ իմ կարծիքը կարեւոր չէ: Վռամ Գյուլզադյանի հետ կապված նախարարությունն ասելիք չունի»: